தனியார் ஆஸ்பத்திரி டாக்டர்களுடன் சப்-கலெக்டர் ஆலோசனை

பொள்ளாச்சி:

பொள்ளாச்சி நகராட்சி அலுவலகத்தில் கொரோனா தொற்று நோய் தடுப்பு நடவடிக்கையாக தனியார் ஆஸ்பத்திரி டாக்டர்களுடன் ஆலோசனை கூட்டம் நடைபெற்றது. கூட்டத்திற்கு சப்-கலெக்டர் வைத்திநாதன் தலைமை தாங்கி பேசினார். அப்போது அவர் கூறியதாவது:-

தனியார் ஆஸ்பத்திரிகளை தினமும் 4 வேளை கிருமி நாசினி மருந்து கொண்டு சுத்தப்படுத்த வேண்டும். 3 மணி நேரத்திற்கு ஒரு முறை இந்த பணிகளை செய்ய வேண்டும். ஆஸ்பத்திரிக்கு வரும் நோயாளிகள், உள்நோயாளிகளின் உறவினர்களுக்கு தெர்மல் ஸ்கேனர் மூலம் உடல்வெப்பநிலை கண்டறிந்து காய்ச்சல் பரிசோதனை செய்த பிறகே அனுமதிக்க வேண்டும். மேலும் நுழைவு பகுதியில் சானிடைசர் (கிருமி நாசினி மருந்து) வைத்து கைகளை சுத்தப்படுத்த அறிவுறுத்த வேண்டும்.


இவ்வாறு அவர் கூறினார்.

கூட்டத்தில் கலந்துகொண்ட டாக்டர்கள் கூறுகையில், மருந்து கடைகளில் காய்ச்சலுக்கு மருந்து மாத்திரைகள் கொடுக்கின்றனர். இதை தடுக்க நடவடிக்கை எடுக்க வேண்டும் என்றனர். அதற்கு சப்-கலெக்டர் வைத்திநாதன் உரிய நடவடிக்கை எடுப்பதாக தெரிவித்தார். கூட்டத்தில் நகராட்சி கமிஷனர் காந்திராஜ், நகர்நல அலுவலர் மாணிக்கவேல்ராஜ், கோட்டூர் அரசு ஆஸ்பத்திரி தலைமை டாக்டர் ராஜா, கொரோனா சிறப்பு டாக்டர் விஜயகுமார், போலீஸ் இன்ஸ்பெக்டர்கள் மகேந்திரன், வைரம் மற்றும் தனியார் ஆஸ்பத்திரி டாக்டர்கள் உள்பட பலர் கலந்துகொண்டனர்.