மக்களுக்கு நல்லது செய்யவே போலீஸ் தேர்வு எழுதினேன் - திருநங்கை கவி

திருப்பூர்:

தமிழ்நாடு சீருடை பணியாளர் தேர்வாணையம் சார்பில் 2-ம் நிலை காவலர்கள், 2-ம் நிலை சிறைகாவலர்கள் மற்றும் தீயணைப்பு வீரர்களை தேர்வு செய்வதற்கான எழுத்து தேர்வு தமிழகம் முழுவதும் நேற்று நடந்தது.

இதற்காக திருப்பூரில் ஜெய்வாபாய் பள்ளி மற்றும் குமரன் மகளிர் கல்லூரி உள்ளிட்ட இடங்களில் தேர்வு மையம் அமைக்கப்பட்டிருந்தது. தேர்வு எழுதுவதற்காக மாவட்டம் முழுவதிலும் இருந்து 3 ஆயிரத்து 306 ஆண்கள், 476 பெண்கள் என மொத்தம் 3,782 பேர் விண்ணப்பித்திருந்தனர். ஆனால், விண்ணப்பித்திருந்தவர்களில் 3,058 பேர் மட்டுமே தேர்வு எழுத வந்திருந்தனர். 724 பேர் தேர்வு எழுத வரவில்லை.


போலீஸ் தேர்வு எழுதிய திருநங்கை கவி கூறியதாவது:-

சிறுவயதில் இருந்தே போலீஸ் துறையில் பணியாற்ற வேண்டும் என்பது எனது ஆசை. எனது நண்பர்களும், என்னுடன் இருக்கும் திருநங்கைகளும் என்னை ஊக்கப்படுத்தினார்கள். என்னை போன்ற திருநங்கை ஒருவர் ஏற்கனவே போலீஸ் சப்-இன்ஸ்பெக்டராக பணியாற்றி வருகிறார். அதையே முன்மாதிரியாக எடுத்து கொண்டு போலீஸ் துறையில் இணைந்து பணியாற்ற வேண்டும். மக்களுக்கு நல்லது செய்ய வேண்டும் என்கிற முழு முயற்சியுடன் படித்து தேர்வு எழுதியுள்ளேன். எங்களை இழிவாக பார்க்கும் சமூகத்தின் பார்வையில் நான் நல்ல நிலையில் வரவேண்டும். இதில் வெற்றி பெறுவேன் என்று நம்புகிறேன்.

இவ்வாறு அவர் கூறினார்.