ஒருநாள் கிரிக்கெட் தரவரிசை: முதலிடத்தில் இருக்கும் விராட் கோலியை நெருங்கும் ரோகித் சர்மா

ஒருநாள் கிரிக்கெட் போட்டிக்கான தரவரிசையை ஐசிசி வெளியிட்டுள்ளது. பேட்ஸ்மேன்களுக்கான தரவரிசையில் இந்திய அணி கேப்டன் விராட் கோலி 891 புள்ளிகளுடன் முதல் இடத்தில் நீடிக்கிறார். 2-வது இடத்தில் ரோகித் சர்மா உள்ளார். உலகக்கோப்பையில் ஐந்து சதங்கள் விளாசியதால் 885 புள்ளிகள் பெற்றுள்ளார். விராட் கோலிக்கும் ரோகித் சர்மாவுக்கும் இடையில் 6 புள்ளிகளே வித்தியாசம் உள்ளன.

3-வது இடத்தில் பாகிஸ்தான் பேட்ஸ்மேன் பாபர் ஆசம் உள்ளார். அவர் 827 புள்ளிகள் பெற்றுள்ளார். டு பிளிசிஸ் 820 புள்ளிகளுடன் 4-வது இடத்திற்கு முன்னேறியுள்ளார். உலகக்கோப்பையில் சொதப்பிய நியூசிலாந்து பேட்ஸ்மேன் ராஸ் டெய்லர் 5-வது இடத்திற்கு சரிந்துள்ளார்.

உலகக்கோப்பையில் மூன்று சதங்கள் அடித்துள்ள டேவிட் வார்னர் 6-வது இடத்திற்கு முன்னேறியுள்ளார். ஜோ ரூட் 7-வது இடத்திலும், கேன் வில்லியம்சன் 8-வது இடத்திலும், குயிண்டான் டி கான் 9-வது இடத்திலும், ஆரோன் பிஞ்ச் 10-வது இடத்திலும் உள்ளனர்.

பந்து வீச்சு தரவரிசையில் பும்ரா 814 புள்ளிகளுடன் தொடர்ந்து முதல் இடத்தில் நீடிக்கிறார். டிரென்ட் போல்ட் 2-வது இடத்திலும், பேட் கம்மின்ஸ் 3-வது இடத்திலும், ரபாடா 4-வது இடத்திலும், இம்ரான் தாஹிர் ஐந்தாவது இடத்திலும் உள்ளனர். குல்தீப் யாதவ் 9-வது இடத்திலும், சாஹல் 11-வது இடத்திலும் உள்ளனர்.