செய்திகள்
வாக்களிப்பதற்காக வரிசையில் நிற்கும் வாக்காளர்கள்

ஜம்மு காஷ்மீர் மாவட்ட வளர்ச்சி கவுன்சில் தேர்தல்- 7ம் கட்ட வாக்குப்பதிவு

Published On 2020-12-16 06:33 GMT   |   Update On 2020-12-16 06:33 GMT
ஜம்மு காஷ்மீர் மாவட்ட வளர்ச்சி கவுன்சில் தேர்தலின் 7ம் கட்ட வாக்குப்பதிவு இன்று பலத்த பாதுகாப்புடன் நடைபெறுகிறது.
ஸ்ரீநகர்:

ஜம்மு காஷ்மீரில் மாவட்ட வளர்ச்சி கவுன்சில் தேர்தல் 8 கட்டங்களாக நடைபெறுகிறது. அதனுடன் சேர்த்து உள்ளாட்சி அமைப்புகளில் காலியாக உள்ள பதவிகளுக்கும் தேர்தல் நடத்தப்படுகிறது. இதில் 6 கட்ட வாக்குப்பதிவு முடிவடைந்துள்ளது. 

இந்நிலையில் 7ம் கட்ட வாக்குப்பதிவு இன்று காலை பலத்த பாதுகாப்புடன் தொடங்கி விறுவிறுப்பாக நடைபெறுகிறது. காஷ்மீர் பள்ளத்தாக்கின் பெரும்பாலான இடங்களிலும், செனாப் பள்ளத்தாக்கின் சில பகுதிகளிலும் கடும் குளிர் மற்றும் பனிமூட்டம் காரணமாக வாக்குப்பதிவு மிகவும் மந்தமாக உள்ளது. வாக்குச்சாவடிகளில் கொரோனா வழிகாட்டு நெறிமுறைகள் பின்பற்றப்படுகின்றன. மதியம் 2 மணி வரை வாக்குப்பதிவு நடைபெறும் என அறிவிக்கப்பட்டுள்ளது. 

ஜம்முவில் 18 தொகுதிகள், காஷ்மீர் பிராந்தியத்தில் 13 தொகுதிகள் என மொத்தம் 31 மாவட்ட வளர்ச்சிக் கவுன்சில் தொகுதிகளுக்கு இன்று தேர்தல் நடைபெறுகிறது. போட்டியின்றி தேர்ந்தெடுக்கப்பட்ட வார்டு உறுப்பினர்கள், பஞ்சாயத்து தலைவர் பதவிகள் தவிர, மீதமுள்ள பதவிகளுக்கு தேர்தல் நடைபெறுகிறது. 

இந்த தேர்தலில் 6.87 லட்சம் வாக்காளர்கள் வாக்களிக்க தகுதி பெற்றுள்ளனர். இவர்கள் வாக்களிப்பதற்காக 1852 வாக்குச்சாவடிகள் அமைக்கப்பட்டுள்ளன. 

தேசிய மாநாட்டு கட்சி, மக்கள் ஜனநாயகக் கட்சி (பி.டி.பி), மக்கள் மாநாடு மற்றும் மார்க்சிஸ்ட் கம்யூனிஸ்ட் கட்சி உள்ளிட்ட கட்சிகள் குப்கர் பிரகடனத்திற்கான மக்கள் கூட்டணியை உருவாக்கி முதல் முறையாக தேர்தலை சந்திக்கின்றன. தேசிய கட்சிகளான பாஜக மற்றும் காங்கிரசும் களத்தில் உள்ளன.

டிசம்பர் 19 ம் தேதி இறுதிக்கட்ட தேர்தல் நடைபெறுகிறது. வாக்கு எண்ணிக்கை டிசம்பர் 22 ம் தேதி நடைபெறும்.
Tags:    

Similar News