87-வது பிறந்த நாள் - மன்மோகன்சிங்குக்கு தலைவர்கள் வாழ்த்து

புதுடெல்லி:

முன்னாள் பிரதமரும், காங்கிரஸ் மூத்த தலைவருமான மன்மோகன்சிங் தனது 87-வது பிறந்தநாளை நேற்று கொண்டாடினார். அவருக்கு காங்கிரஸ் இடைக்கால தலைவர் சோனியாகாந்தி வாழ்த்து தெரிவித்து உள்ளார். அவர் தனது வாழ்த்து செய்தியில், ‘பொருளாதாரம், வளர்ச்சி மூலம் தேசத்தை கட்டமைக்கும் பணியில் மன்மோகன்சிங்கின் மிகப்பெரிய பங்களிப்பை நினைவு கொள்கிறோம். தற்போதைய தலைவர்கள் அவரிடம் இருந்து உள்ளார்ந்த ஞானத்தை கற்றுக்கொள்ள வேண்டும்’ என்று குறிப்பிட்டுள்ளர்.

இதேபோல் முன்னாள் தலைவர் ராகுல்காந்தி வெளியிட்டுள்ள வாழ்த்து செய்தியில், ‘தேச நன்மைக்காக மன்மோகன்சிங் செய்த தன்னலமில்லா சேவை, தியாகத்தை இந்த நாளில் நினைவு கூர்கிறோம்’ என்று குறிப்பிட்டுள்ளார்.

முன்னாள் மத்திய மந்திரி ப.சிதம்பரம் சார்பில் அவரது குடும்பத்தினர் டுவிட்டரில் வாழ்த்து தெரிவித்து உள்ளனர். அதில், ‘தற்போதைய பொருளாதார சரிவில் இருந்து நாட்டை மீட்டு சரியான வழியை மன்மோகன் சிங்கால் மட்டுமே காட்ட முடியும்’ என்று குறிப்பிட்டுள்ளனர்.

இதேபோல மூத்த காங்கிரஸ் தலைவர் ஜெய்ராம் ரமே‌‌ஷ், முதல்-மந்திரிகள் அசோக் கெலாட் (ராஜஸ்தான்), முதல்-மந்திரி அமரிந்தர் சிங் (பஞ்சாப் ), தி.மு.க. தலைவர் மு.க.ஸ்டாலின் ஆகியோரும் பிறந்த நாள் வாழ்த்து தெரிவித்து உள்ளனர்.