உள்ளூர் செய்திகள்
சாலைகளை சீரமைக்க விரைவாக நிதி ஒதுக்குங்கள்: மத்திய அமைச்சரிடம் விஜய் வசந்த் எம்.பி. கோரிக்கை
மோசமான நிலையில் உள்ள நாகர்கோவில் களியக்காவிளை தேசிய நெடுஞ்சாலையை சீரமைக்கக்கோரி விஜய் வசந்த் எம்.பி. மத்திய அமைச்சர் நிதின் கட்கரியிடம் கோரிக்கை விடுத்துள்ளார்.
கன்னியாகுமரி தொகுதி நாடாளுமன்ற உறுப்பினர் விஜய் வசந்த் இன்று மத்திய சாலை மற்றும் போக்குவரத்து துறை அமைச்சர் நிதின் கட்கரியை சந்தித்தார்.
அப்போது குமரி மாவட்டத்தில் பழுதடைந்த சாலைகளை விரைவில் செப்பனிட நிதி ஒதுக்குமாறு கேட்டு கொண்டார். நாகர்கோவில் களியக்காவிளை தேசிய நெடுஞ்சாலை மிகவும் மோசமான நிலையில் இருப்பதாகவும் சாலையின் குண்டு குழிகள் காரணமாக விபத்துகளும் உயிரிழப்புகள் ஏற்படுவதையும் சுட்டிக்காட்டினார்.
2017 முதல் கடந்த நான்கு வருடங்களாக சாலை பராமரிப்பு பல்வேறு காரணங்களால் நடைபெறாமல் இருப்பதை எடுத்துரைத்த விஜய் வசந்த் பணிகளை போர்க்கால அடிப்படையில் விரைவில் முடிக்க உடனடியாக நிதி ஒதுக்கீடு செய்ய கேட்டு கொண்டார்.