தாராபுரத்தில் சிறுமியை கடத்தி கற்பழித்த வாலிபர் கைது

தாராபுரம்:

தாராபுரம் காந்திபுரம் வடதாரை பகுதியைச் சேர்ந்தவர் பிரகாஷ் (வயது 21). இவர் அந்த பகுதியில் வசிக்கும் உறவுப்பெண்ணான 13 வயது சிறுமியுடன் நெருங்கி பழகி வந்தார்.

கடந்த 14-ந்தேதி அந்த சிறுமி வீட்டில் இருந்து திடீரென மாயமானார். இதனால் அதிர்ச்சி அடைந்த சிறுமியின் பெற்றோர் அவரை பல இடங்களில் தேடி பார்த்தனர். ஆனால் சிறுமியை கண்டுபிடிக்க முடியவில்லை. இதையடுத்து சிறுமி மாயமானது பற்றி அவர்கள் தாராபுரம் போலீஸ் நிலையத்தில் புகார் செய்தனர்.

புகாரில் எங்கள் மகளை பிரகாஷ் கடத்திச் சென்று இருக்க வாய்ப்புள்ளது எனவும், எனவே அவரிடம் இருந்து மகளை மீட்டுத்தர வேண்டும் எனவும் கூறி இருந்தனர். அதன்பேரில் போலீசார் சிறுமியை தேடினர்.

இந்தநிலையில் பழனி அருகே உள்ள ஒரு கிராமத்தில் சிறுமியுடன் பிரகாஷ் பதுங்கி இருப்பது தெரியவந்தது. இதையடுத்து போலீசார் அங்கு விரைந்து சென்று சிறுமியை மீட்டு விசாரித்தனர். அப்போது சிறுமியை, பிரகாஷ் கடத்திச் சென்று பாலியல் பலாத்காரம் செய்தது தெரியவந்தது.

சிறுமியை மீட்ட போலீசார் அவரை மருத்துவ பரிசோதனைக்காக அனுப்பி வைத்தனர். பிரகாஷ் மீது போக்சோ சட்டத்தின் கீழ் வழக்குப்பதிவு செய்து கைது செய்தனர்.