காவு வாங்கிய பாலம் - பைக்குடன் 12 அடி பள்ளத்தில் விழுந்த வாலிபர் பலி

திண்டுக்கல்:

திண்டுக்கல் மாவட்டம் கோபால்பட்டி அருகே உள்ள மந்தநாயக்கன்பட்டியைச் சேர்ந்த முத்துசாமி மகன் பரமேஸ்வரன் (வயது 35) கட்டிட வேலை பார்த்து வந்தார். இவருக்கு திருமணம் ஆகி ஒரு மகனும், 2 மகள்களும் உள்ளனர்.

நேற்று இரவு வேலை முடித்து விட்டு வீட்டுக்கு செல்வதற்காக தனது நண்பரிடம் மோட்டார் சைக்கிளை வாங்கிக் கொண்டு நத்தம் சாலையில் வந்து கொண்டு இருந்தார். ரெட்டியபட்டி அருகே பாலப்பணிகளுக்காக பள்ளம் தோண்டப்பட்டு இருந்தது. வாகனங்கள் செல்ல மாற்றுப்பாதை அமைக்கப்பட்டு இருந்தது.

இதனை கவனிக்காமல் வந்த பரமேஸ்வரன் தடுப்பு கம்பி மீது மோதி 12 அடி பள்ளத்தில் தவறி விழுந்தார். உடனே அருகில் இருந்தவர்கள் அவரை காப்பாற்ற முயன்றனர். 108 ஆம்புலன்சுக்கு தகவல் தெரிவிக்கப்பட்டது.

ஆனால் பின் தலையில் பலத்த அடிபட்ட நிலையில் பரமேஸ்வரன் சம்பவ இடத்திலேயே உயிரிழந்தார். இது குறித்து திண்டுக்கல் தாலுகா போலீசார் வழக்கு பதிவு செய்து விசாரணை நடத்தி வருகின்றனர்.