ராஜபாளையத்தில் இன்று காலை விபத்து - தச்சு தொழிலாளி பலி

ராஜபாளையம்:

ராஜபாளையம் மலையடிப்பட்டி பகுதியைச் சேர்ந்தவர் மாடசாமி (வயது60). தச்சு தொழிலாளியான இவர் இன்று காலை மொபட்டில் வேலைக்கு புறப்பட்டார்.

டி.பி. மில்ஸ் ரோடு- மதுரை ரோடு சந்திப்பில் சென்று கொண்டிருந்த போது பின்னால் வந்த லாரி எதிர்பாராதவிதமாக மொபட் மீது மோதியது. இதில் தூக்கி வீசப்பட்ட மாடசாமி ரத்த வெள்ளத்தில் சம்பவ இடத்திலேயே பரிதாபமாக இறந்தார்.

இதுகுறித்து தகவல் அறிந்த ராஜபாளையம் வடக்கு போலீஸ் சப்- இன்ஸ்பெக்டர் முத்துக் குமார் மற்றும் போலீசார் சம்பவ இடம் வந்து உடலை கைப்பற்றி பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தனர்.

விபத்து தொடர்பாக லாரி டிரைவர் மலையடிப் பட்டியைச் சேர்ந்த முகமது ராவ் (45) என்பவரை போலீசார் கைது செய்தனர்.