லைஃப்ஸ்டைல்
மாதவிடாய் நாப்கின்

மாதவிடாய் நாப்கின்: ஒரு பக்கம் பலன்.. மறுபக்கம் பாதிப்பு..

Published On 2021-04-05 08:30 GMT   |   Update On 2021-04-05 08:30 GMT
மாதவிடாய் நாட்களில் பெரும்பாலான பெண்கள் பயன்படுத்தும் நாப்கின் அசவுகரியத்தை அது போக்கினாலும், அதில் கலந்திருக்கும் சில ரசாயனங்கள் பெண்களின் உடலுக்கு பக்கவிளைவுகளை ஏற்படுத்தக்கூடியவை.
மாதவிடாய் நாட்களில் பெரும்பாலான பெண்கள் நாப்கின் பயன்படுத்துகிறார்கள். அந்த நாட்களில் ஏற்படும் அசவுகரியத்தை அது போக்கினாலும், அதில் கலந்திருக்கும் சில ரசாயனங்கள் பெண்களின் உடலுக்கு பக்கவிளைவுகளை ஏற்படுத்தக்கூடியவை. அதனால் தான் ரசாயன கலப்பில்லாத மற்றும் சுற்றுச்சூழலுக்கு மாசு ஏற்படுத்தாத நாப்கின்களை தயாரிப்பது, அவற்றை பயன்படுத்துவது பற்றிய விழிப்புணர்வு பெருகிக்கொண்டிருக்கிறது.

‘‘நாப்கின்கள் பயன்படுத்துவதற்கு பாதுகாப்பானவைதான் என்றாலும் மாதவிடாய் உதிரப்போக்கை உறிஞ்சக்கூடிய டையாக்சின் மற்றும் பாலிமர் போன்ற சில வேதிப்பொருட்கள் அதில் இடம்பெற்றிருப்பது பிறப்பு உறுப்பில் புற்றுநோய் ஏற்படும் அபாயத்தை உருவாக்கக்கூடும். அத்துடன் டையாக்சின் உடலில் சேர்ந்தால் கருப்பை வாய் புற்றுநோய் ஏற்படலாம். அதனால்தான் 3-4 மணி நேரத்திற்கு ஒருமுறை நாப்கினை மாற்றிவிட வேண்டும்’’ என்கிறார், மகப்பேறு மருத்துவர் அருணா கல்ரா.



டையாக்சின் என்பது நாப்கின்களை பிளீச்சிங் செய்வதற்கு பயன்படுத்தப்படும் ரசாயனமாகும். இது பலவிதமான நோய் பாதிப்புகளை ஏற்படுத்தக்கூடியது. அதுபோல் நாப்கின்களில் வாசனைக்காக செயற்கை நறுமண பொருட்களை சேர்க்கிறார்கள். அதுவும் ஆபத்தானது. நாப்கின்களை முறையாக பயன்படுத்தாவிட்டால் கருத்தரிப்பதில் சிக்கல், ஹார்மோன் பிறழ்ச்சி, உறுப்பு பகுதியில் ஒவ்வாமை, இடுப்பு பகுதியில் அழற்சி, தைராய்டு குறைபாடு போன்ற பாதிப்புகளும் உருவாகக்கூடும்.

நாப்கின் தயாரிப்பில் பருத்தி பயன்படுத்தப்பட்டாலும் அதனை விளைவிப்பதற்கு பூச்சிக்கொல்லி மருந்து பயன்படுத்துவது கூட பாதிப்பை ஏற்படுத்தும். அத்துடன் பருத்தியை பளிச்சென்ற வெண்மை நிறத்திற்கு மாற்றுவதற்கும் டையாக்சினை பயன்படுத்துகிறார்கள். டையாக்சின் அதிகம் கலப்பது, பாதிப்பை ஏற்படுத்தும் என்பதால்தான் ரசாயனம் குறைந்த நாப்கின்கள் புழக்கத்திற்கு வர தொடங்கியுள்ளன. ஒவ்வொரு பெண்ணும் தன் வாழ்நாளில் சராசரியாக 6 ஆயிரம் முதல் 7 ஆயிரம் நாப்கின்களை பயன்படுத்துகிறார். அப்படியென்றால் டையாக்சின் அதிகம் சேர்க்கப்பட்டிருக்கும் நாப்கின் எந்த அளவிற்கு பாதிப்பை ஏற்படுத்தும் என்பதை யூகித்துக்கொள்ளலாம். ரசாயன கலப்பில்லாத நாப்கின்களை பயன்படுத்துவதே உடல் ஆரோக்கியத்திற்கு ஏற்றது.
Tags:    

Similar News