கார்த்திகை தீபத்திருநாள் அன்று மருதமலை மலை கோவிலுக்கு வாகனங்களில் செல்ல தடை

கோவையில் பிரசித்தி பெற்ற மருதமலை சுப்பிரமணிய சுவாமி கோவில் அமைந்துள்ளது. இந்த கோவில் முருகப்பெருமானின் 7-வது படைவீடாக பக்தர்களால் போற்றப்படுகிறது. இங்கு பண்டிகை காலங்களில் ஏராளமான பக்தர்கள் வந்து சுவாமி தரிசனம் செய்து செல்வார்கள். இந்த நிலையில் மருதமலை சுப்பிரமணியசுவாமி கோவிலில் வருகிற 6-ந்தேதி கார்த்திகை தீபத்திருவிழாவையொட்டி சிறப்பு பூஜைகள் செய்யப்படுகிறது. இதனால் அன்றைய தினம் மலை அடிவாரத்தில் இருந்து மலைக்கோவிலுக்கு வாகனங்களில் செல்ல தடை விதிக்கப்பட்டுள்ளதாக கோவில் துணை ஆணையர் ஹர்ஷினி தெரிவித்துள்ளார். இதுகுறித்து அவர் கூறியதாவது:-

வருகிற 6-ந்தேதி தீபத்திருவிழாவையொட்டி கோவிலுக்கு ஏராளமான பக்தர்கள் வருவார்கள். இதனால் மலை கோவிலுக்கு வாகனங்களில் செல்வதால் போக்குவரத்து நெருக்கடி ஏற்பட வாய்ப்பு உள்ளது. எனவே அன்றைய தினம் காலை 6 முதல் மாலை 7 மணி வரை, அடிவாரத்தில் இருந்து மலைகோவிலுக்கு இருசக்கர மற்றும் 4 சக்கர வாகனங்களில் செல்ல அனுமதி இல்லை. கோவில் அடிவாரத்தில் இருந்து தேவஸ்தான பஸ்கள் வாயிலாக, பக்தர்கள் மலைக்கு மேல் உள்ள கோவிலுக்கு சென்று தீபம் ஏற்றும் விழாவை காணலாம். மறுநாள் வழக்கம் போல் வாகனங்களில் மலைக்கு செல்லலாம்.

இவ்வாறு அவர் கூறினார்.