மேலூர் நாகம்மாள் கோவில் திருவிழா

மேலூரில் நகராட்சி அலுவலகம் அருகே பிரசித்தி பெற்ற நாகம்மாள் கோவில் உள்ளது. இங்கு ஆண்டுதோறும் ஆடி மாதம் நடைபெறும் திருவிழா, பால்குடம் மற்றும் முளைப்பாரி எடுத்தல் என 2 நாட்கள் நடைபெறும். அதன்படி இந்த ஆண்டிற்கான திருவிழா நேற்று தொடங்கியது. காலை 8 மணி அளவில் மேலூரின் மைய பகுதியான மண்கெட்டி தெப்பக்குளம் முன்பாக இருந்து நகைக்கடை பஜார், காந்திஜி பூங்கா தெரு, பெரியகடை வீதி, அரசு ஆஸ்பத்திரி வரை 2 கி.மீ. தூரத்துக்கு பால்குடம் எடுக்கும் பக்தர்கள் வரிசையாக நின்றனர். பாரம்பரிய வழக்கப்படி நாகம்மாள் கோவில் பூசாரிகள் வந்து விழாவை தொடங்கி வைத்தனர்.

விழாவில் பெண்கள் உள்பட ஏராளமானோர் பால்குடம் எடுத்து நாகம்மாள் கோவிலுக்கு ஊர்வலம் வந்தனர். மேலும் பக்தர்கள் 100-க்கும் மேற்பட்டோர் அலகு குத்தியும் வந்திருந்தனர். மதுரை புறநகர் பகுதிகளில் இருந்து விரதமிருந்து காப்புக்கட்டி வந்த திருநங்கைகளும் பால் குடம் எடுத்து கோவிலுக்கு வந்தனர்.

காலை 9 மணி அளவில் தொடங்கிய ஊர்வலம் மதியம் 1 மணி வரை நடைபெற்றது.

நாகம்மாள் கோவிலில் பெரிய அண்டாக்களில் பக்தர்கள் கொண்டு வந்த பால் ஊற்றப்பட்டு, பின்னர் அங்கிருந்து மின் மோட்டார் மூலமாக பால் எடுத்துச் செல்லப்பட்டு நாகம்மாளுக்கு தொடர்ச்சியாக பாலாபிஷேகம் நடைபெற்றது. பால்குட ஊர்வலம் காரணமாக மேலூரில் நேற்று 4 மணி நேரம் போக்குவரத்து ஸ்தம்பித்தது.

கூட்டத்தை கட்டுப்படுத்தவும், பாதுகாப்பு பணியில் போதுமான அளவு போலீசார் பணியில் இல்லை என்று பக்தர்கள் குற்றம் சாட்டினர்.

திருவிழாவில் இன்று(புதன்கிழமை) மாலை 5 மணி அளவில் ஏராளமான பெண் பக்தர்கள் கலந்து கொள்ளும் முளைப்பாரி ஊர்வலம் நடைபெற உள்ளது.

இதனால் இன்று மாலை 4 மணி முதல் 8 மணி வரை மேலூருக்குள் வாகன போக்குவரத்து நிறுத்தப்பட்டு புறவழிச்சாலை வழியாக திருப்பி விடப்பட உள்ளது.