ரெனால்ட் நிறுவனத்தின் பிரபலமான க்விட் ஹேட்ச்பேக் காரின் ஃபேஸ்லிஃப்ட் மாடல் இந்திய வெளியீட்டு விவரங்களை பார்ப்போம்.
க்விட் கே.இசட்.இ.
ரெனால்ட் இந்தியா நிறுவனம் தனது க்விட் ஃபேஸ்லிஃப்ட் காரை விரைவில் இந்தியாவில் அறிமுகம் செய்ய இருக்கிறது. தற்சமயம் வெளியாகி இருக்கும் தகவல்களில் க்விட் ஃபேஸ்லிஃப்ட் கார் அடுத்த மாதம் அறிமுகம் செய்யப்படும் என தெரிகிறது. புதிய க்விட் கார் தற்போதைய மாடல்களில் உள்ளதை போன்றே பி.எஸ்.4 ரக என்ஜின்களை கொண்டிருக்கும் என எதிர்பார்க்கப்படுகிறது.
க்விட் ஃபேஸ்லிஃப்ட் மாடல் சர்வதேச சந்தையில் விற்பனை செய்யப்படும் க்விட் கே.இசட்.இ. எலெக்ட்ரிக் காரை தழுவிய வடிவமைப்பு கொண்டிருக்கும். க்விட் கே.இசட்.இ. போன்ற ஹெட்லேம்ப் செட்டப் புதிய க்விட் காரிலும் வழங்கப்படலாம் என தெரிகிறது.
இத்துடன் எல்.இ.டி. டி.ஆர்.எல்.கள் கிரில் அருகில் பொருத்தப்படலாம் என்றும், ஹெட்லேம்ப் பம்ப்பரின் கீழ் இருக்கும் என கூறப்படுகிறது. இதன் டெயில் லேம்ப்களிலும் எல்.இ.டி.க்கள் வழங்கப்பட்டு, முன்புறம் மற்றும் பின்பக்கங்களில் புதிய வடிவமைப்பு கொண்ட பம்ப்பர் வழங்கப்படலாம் என தெரிகிறது.
புதிய க்விட் ஃபேஸ்லிஃப்ட் மாடலில் 800சிசி என்ஜின் வழங்கப்படலாம் என தெரிகிறது. இந்த என்ஜின் 54 ஹெச்.பி. பவர், 72 என்.எம். டார்க் செயல்திறன் வழங்குகிறது. 1.0 லிட்டர் என்ஜின் 65 ஹெச்.பி. பவர், 91 என்.எம். டார்க் செயல்திறன் வழங்குகிறது. முதற்கட்டமாக ஃபேஸ்லிஃப்ட் மாடலில் பி.எஸ்.4 ரக என்ஜின் வழங்கப்பட்டு, அதன்பின் பி.எஸ்.6 என்ஜின்கள் வழங்கப்படும் என கூறப்படுகிறது.
பாதுகாப்பிற்கு புதிய க்விட் மாடலில் டூயல் ஏர்பேக் வழங்கப்படலாம் என தெரிகிறது. இது அக்டோபர் 2019 முதல் அமலாக இருக்கும் கிராஷ் டெஸ்ட் விதிகளை பூர்த்தி செய்யும் வகையில் இருக்கும் என கூறப்படுகிறது. தற்சமயம் விற்பனை செய்யப்படும் க்விட் மாடலில் ஒற்றை ஏர்பேக் வழங்கப்பட்டிருக்கிறது.
இந்தியாவில் அறிமுகமானதும் புதிய ரெனால்ட் க்விட் ஃபேஸ்லிஃப்ட் மாடல் மாருதி சுசுகி எஸ் பிரெஸ்ஸோ மற்றும் அடுத்த மாதம் அறிமுகமாக இருக்கும் ஹேட்ச்பேக் மாடல்களுக்கு போட்டியாக இருக்கும் என கூறப்படுகிறது.
Related Tags :