மூன்று வாரங்களில் பத்து லட்சம் யூனிட்கள் விற்பனையான ரெட்மி ஸ்மார்ட்போன்

ரெட்மி நோட் 7 ஸ்மார்ட்போன் பத்து லட்சம் யூனிட்கள் விற்பனையாகி இருப்பதாக ரெட்மி தலைமை செயல் அதிகாரி லு வெய்பிங் தனது வெய்போவில் தெரிவித்திருக்கிறார். ரெட்மி தனி பிராண்டாக உருவெடுத்த பின் அறிமுகமான முதல் ஸ்மார்ட்போனாக ரெட்மி நோட் 7 இருக்கிறது.

சீனாவில் கடந்த வாரம் விற்பனைக்கு வந்த ரெட்மி நோட் 7 ஸ்மார்ட்போன் ஒரு வாரத்திற்குள் பத்து லட்சம் யூனிட்கள் விற்பனையாகி இருக்கிறது. தற்சமயம் சீனாவில் மட்டும் ரெட்மி நோட் 7 விற்பனையாகி வருகிறது. இந்த ஸ்மார்ட்போன் விரைவில் இந்தியாவில் அறிமுகமாக இருக்கிறது.

ரெட்மி நோட் 7 ஸ்மார்ட்போன் 3 ஜி.பி. ரேம், 32 ஜி.பி. மெமரி, 4 ஜி.பி. ரேம், 64 ஜி.பி. மெமரி மற்றும் 6 ஜி.பி. ரேம், 64 ஜி.பி. மெமரி என மூன்று வித வேரியண்ட்களில் விற்பனை செய்யப்படுகிறது. இதுதவிர ரெட்மி தனது நோட் 7 ஸ்மார்ட்போனின் 6 ஜி.பி. ரேம், 128 ஜி.பி. மெமரி வேரியண்ட் உருவாக்கப்படுவதாக சில தினங்களுக்கு முன் அறிவித்தது.

ரெட்மி நோட் 7 ஸ்மார்ட்போனின் சிறப்பம்சங்களை பொருத்தவரை 6.3 இன்ச் ஃபுல் ஹெச்.டி. பிளஸ் டிஸ்ப்ளே, 2340x1080 பிக்சல், வாட்டர் டிராப் ரக நாட்ச், ஸ்னாப்டிராகன் 660 பிராசஸர் மற்றும் 4000 எம்.ஏ.ஹெச். பேட்டரி மூலம் சக்தியூட்டப்படுகிறது. யு.எஸ்.பி. டைப்-சி வசதி கொண்டிருக்கும் ரெட்மி நோட் 7 ஸ்மார்ட்போனில் குவால்காமின் க்விக் சார்ஜ் 4.0 தொழில்நுட்பமும் வழங்கப்பட்டுள்ளது.

இத்துடன் 48 எம்.பி. பிரைமரி கேமரா, f/1.8 லென்ஸ், 5 எம்.பி. இரண்டாவது பிரைமரி கேமரா, ஏ.ஐ. வசதி வழங்கப்பட்டிருக்கிறது. இத்துடன் 13 எம்.பி. செல்ஃபி கேமரா, ஏ.ஐ. அம்சங்கள் மற்றும் போர்டிரெயிட் மோட் வழங்கப்பட்டிருக்கிறது.

இந்தியாவில் ரெட்மி நோட் 7 ஸ்மார்ட்போனின் விலை ரூ.9,999 முதல் துவங்கும் என எதிர்பார்க்கப்படுகிறது. புதிய ரெட்மி ஸ்மார்ட்போன் சாம்சங் எம் சீரிஸ் போன்களுக்கு போட்டியாக அமைய இருக்கிறது. இத்துடன் அசுஸ் நிறுவனத்தின் சென்ஃபோன் மேக்ஸ் ப்ரோ எம்2 ஸ்மார்ட்போனும் போட்டியாக இருக்கும்.