செய்திகள்

இந்தியாவையே திரும்பிப் பார்க்க வைத்த தமிழக வாக்காளர்கள்

Published On 2019-05-23 12:41 GMT   |   Update On 2019-05-23 12:41 GMT
பாராளுமன்ற தேர்தலில் இதர மாநிலங்களுக்கு மாறாக மத்தியிலும் மாநிலத்திலும் ஆளும் கட்சிகளுக்கு எதிராக தமிழக வாக்காளர்கள் தங்களது தீர்ப்பை பதிவு செய்துள்ளனர்.
சென்னை:

பாராளுமன்ற தேர்தல் முடிவுகள் வெளியாகிவரும் நிலையில் பல மாநிலங்களில் பாஜக வேட்பாளர்கள் அபாரமான வாக்குகள் வித்தியாசத்தில் வெற்றிமுகம் காட்டி வருகின்றனர். சில மாநிலங்களில் பாஜக கூட்டணி வேட்பாளர்களும் காங்கிரஸ் கூட்டணி மற்றும் அம்மாநிலங்களில் செல்வாக்கு பெற்ற கட்சிகளை சேர்ந்த வேட்பாளர்களும் சரிசமமான பலத்துடன் இறுதிச்சுற்று முடிவுகளுக்காக காத்திருக்கின்றனர்.

ஆனால், இவற்றுக்கு எல்லாம் மாறாக மத்தியிலும் மாநிலத்திலும் ஆளும் கட்சிகளுக்கு எதிராக தமிழக வாக்காளர்கள் தங்களது தீர்ப்பை பதிவு செய்துள்ளனர்.

தமிழ்நாட்டில் உள்ள 38 பாராளுமன்ற தொகுதி மற்றும் புதுச்சேரி ஆகிய 39 பாராளுமன்ற தொகுதிகளுக்கு கடந்த ஏப்ரல் மாதம் 18-ந்தேதி ஓட்டுப்பதிவு நடந்தது. வேலூர் தொகுதிக்கு மட்டும் தேர்தல் நடைபெறவில்லை.

இன்று காலை ஓட்டு எண்ணிக்கை தொடங்கியது. தொடக்கத்தில் இருந்தே தி.மு.க. கூட்டணி அதிக இடங்களில் முன்னணிலை பெற்றது.

முன்னாள் மத்திய மந்திரிகள் தயாநிதிமாறன் (மத்திய சென்னை), டி.ஆர்.பாலு (ஸ்ரீபெரும்புதூர்), ஆ.ராசா (நீலகிரி), ஜெகத் ரட்சகன் (அரக்கோணம்), பழநிமாணிக்கம் (தஞ்சாவூர்) மற்றும் கனிமொழி (தூத்துக்குடி) ஆகிய முக்கிய பிரமுகர்கள் காலையில் இருந்தே அதிக ஓட்டுகள் வித்தியாசத்தில் முன்னிலையில் உள்ளனர்.

மேலும் மத்திய சென்னை, தென் சென்னை, காஞ்சிபுரம், ஸ்ரீபெரும்புதூர், அரக்கோணம், திருவண்ணாமலைகள்ளக்குறிச்சி, தூத்துக்குடி, நெல்லை, திண்டுக்கல், மயிலாடுதுறை, தஞ்சாவூர், வடசென்னை, சேலம், கடலூர், பொள்ளாச்சி, தென்காசி ஆகிய தொகுதிகளில் லட்சத்துக்கும் அதிமான வாக்குகள் வித்தியாசத்தில் தி.மு.க. வேட்பாளர்கள் முன்னிலையில் உள்ளனர்.

தி.மு.க.வின் வெற்றிக் கணக்கில் முதல் வரவாக நீலகிரி தொகுதியில் மத்திய முன்னாள் மந்திரி ஆ.ராசா சுமார் 2 லட்சம் வாக்குகள் வித்தியாசத்தில் வெற்றி பெற்றுள்ளார்.


தி.மு.க. கூட்டணியில் உள்ள கொங்குநாடு மக்கள் தேசிய கட்சி நாமக்கல் தொகுதியிலும், இந்திய ஜனநாயக கட்சி பெரம்பலூர் தொகுதியிலும் உதயசூரியன் சின்னத்தில் போட்டியிட்டது. இந்த 2 தொகுதிகளிலும் தி.மு.க. முன்னிலையில் உள்ளது. பல வேட்பாளர்கள் சுமார் 2 லட்சம் வாக்குகள் வித்தியாசத்தில் முன்னிலையில் இருப்பதால் இவர்களின் வெற்றி உறுதியாகி விட்டதாக கருதப்படுகிறது.

நாமக்கல் தொகுதியில் கொங்குநாடு மக்கள் தேசிய கட்சி வேட்பாளர் சின்ராஜ், பெரம்பலூரில் இந்திய ஜனநாயக கட்சி வேட்பாளர் பாரிவேந்தர் முன்னிலையில் உள்ளனர்.

தி.மு.க. கூட்டணியில் உள்ள காங்கிரஸ் கட்சி சிவகங்கை, திருச்சி, ஆரணி, கிருஷ்ணகிரி, தேனி, கன்னியாகுமரி, விருதுநகர், திருவள்ளூர், கரூர், திருவள்ளூர் ஆகிய 9 தொகுதிகளில் முன்னிலையில் உள்ளன.

சிவகங்கையில் முன்னாள் மத்திய மந்திரியின் ப.சிதம்பரத்தின் மகன் கார்த்தி சிதம்பரமும், திருச்சியில் தமிழக முன்னாள் காங்கிரஸ் தலைவர் திருநாவுக்கரசரும், ஆரணியில் விஷ்ணுபிரசாத்தும், கன்னியாகுமரியில் வசந்தகுமாரும் முன்னிலையில் உள்ளனர்.

விடுதலை சிறுத்தை கட்சி தலைவர் திருமாவளவன் சிதம்பரம் தொகுதியில் போட்டியிட்டார். அவர் தொடக்கத்தில் முன்னிலையில் இருந்தார். பின்னர் சற்று பின்தங்கி மாலை 6 மணி நிலவரப்படி சுமார் 5 ஆயிரம் வாக்குகள் வித்தியாசத்தில் முன்னிலையில் இருந்து வருகிறார்.

விழுப்புரம் தொகுதியில் உதயசூரியன் சின்னத்தில் போட்டியிட்ட விடுதலை சிறுத்தை வேட்பாளர் ரவிக்குமார் முன்னிலையில் உள்ளார். ஈரோடு தொகுதியில் போட்டியிடும் ம.தி.மு.க. வேட்பாளர் கணேசமூர்த்தி முன்னிலையில் உள்ளார்.

தி.மு.க. கூட்டணியில் உள்ள இந்திய கம்யூனிஸ்டு கட்சி நாகப்பட்டினம், திருப்பூர் ஆகிய 2 தொகுதியிலும், மார்க்சிஸ்டு கம்யூனிஸ்டு கட்சி மதுரை, கோவை ஆகிய 2 தொகுதியிலும் முன்னிலையில் உள்ளன.

தி.மு.க. கூட்டணியில் இடம் பெற்றுள்ள முஸ்லிம் லீக் கட்சிக்கு ராமநாதபுரம் தொகுதி ஒதுக்கப்பட்டது. அந்த கட்சி வேட்பாளர் நவாஸ்கனி தொடக்கத்தில் இருந்தே முன்னிலையில் உள்ளார்.

அ.தி.மு.க. கூட்டணி ஒரே ஒரு தொகுதியான தேனியில் மட்டுமே முன்னிலையில் உள்ளது. இங்கு போட்டியிடும் அ.தி.மு.க. வேட்பாளரும் தமிழக துணை முதல்வர் ஓ.பி.எஸ். மகனுமான ரவிந்திரநாத் குமார் சுமார் 40 ஆயிரம் வாக்குகள் வித்தியாசத்தில் முன்னிலையில் உள்ளார்.

தர்மபுரி தொகுதியில் போட்டியிட்ட பா.ம.க. வேட்பாளர் அன்புமணி ராமதாஸ் சுமார் 40 ஆயிரம் வாக்குகள் வித்தியாசத்தில் பின்னடைவை சந்தித்து வருகிறார்.

இதேபோல் வாக்கு எண்ணிக்கை தொடங்கியதில் இருந்தே புதுவையிலும் காங்கிரஸ் கட்சியே முன்னிலையில் உள்ளது குறிப்பிடத்தக்கது.
Tags:    

Similar News