சக்திமுத்து மாரியம்மன் கோவில் திருவிழா

கோவை ராமநாதபுரம் ராமகிருஷ்ணாபுரம் கிருஷ்ணர் கோவில் வீதியில் கண் திறந்து காட்சி அளித்த ஸ்ரீசக்தி முத்து மாரியம்மன் கோவில் உள்ளது. இந்த கோவில் திருவிழா கடந்த 30-ந் தேதி கணபதி ஹோமத்துடன் தொடங்கியது.

இதையடுத்து 108 குடம் நீராட்டுதல், அக்கினி கம்பம் நடுதல் ஆகிய நிகழ்ச்சிகள் நடைபெற்றன. 7-ந் தேதி வரை தினமும் இரவு 8 மணிக்கு அம்மன் திருவீதி உலா, அம்மன் பூச்சட்டி எடுத்து விளையாடுதல் உள்ளிட்ட நிகழ்ச்சிகள் நடைபெறுகின்றன. ஒவ்வொரு நாளும் அம்மன் சிறப்பு அலங்காரத்தில் பக்தர்களுக்கு காட்சி அளிக்கிறார்.

இன்று (வெள்ளிக்கிழமை) மாலை 6 மணிக்கு திருவிளக்கு வழிபாடு, 7-ந் தேதி இரவு 10 மணிக்கு அம்மன் அழைத்தல், திருமண வைபோகம், 8-ந் தேதி காலை 10 மணிக்கு சக்தி கரகம் அழைத்து வருதல், அலகு குத்தி வருதல், பூமிதித்தல், 9-ந் தேதி பகல் 12 மணிக்கு மஞ்சள் நீராடுதல், 10-ந் தேதி பகல் 12 மணிக்கு மகா அன்னதானம், இரவு 7 மணிக்கு மறுபூஜை, அபிஷேக பூஜை, அம்மன் திருவீதி உலா, வான வேடிக்கை ஆகிய நிகழ்ச்சிகள் நடைபெறுகின்றன.

11-ந் தேதி மாலை 6.30 மணிக்கு இன்னிசை நிகழ்ச்சி நடக்கிறது. இதற்கான ஏற்பாடுகளை கோவில் நிர்வாக கமிட்டி மற்றும் பொதுமக்கள் செய்து வருகின்றனர்.