திண்டுக்கல்:
திண்டுக்கல் பாராளுமன்ற தொகுதி வாக்குகள் அண்ணா பல்கலைக்கழக பொறியியல் கல்லூரியில் நடைபெற்றது. இந்த தொகுதியில் தி.மு.க. சார்பில் வேலுசாமி, பா.ம.க. சார்பில் ஜோதிமுத்து, அ.ம.மு.க. சார்பில் ஜோதிமுருகன், நாம் தமிழர் கட்சி சார்பில் நடிகர் மன்சூர் அலிகான், மக்கள் நீதிமய்யம் சார்பில் டாக்டர் சுதாகரன் ஆகியோர் போட்டியிட்டனர்.
வாக்கு எண்ணிக்கை தொடங்கியதில் இருந்தே அதிக வாக்குகள் வித்தியாசத்தில் தி.மு.க. வேட்பாளர் வேலுசாமி முன்னிலையில் இருந்தார். 23 சுற்றுகள் முடிவில் அவர் 5,38,972 வாக்குகள் வித்தியாசத்தில் வெற்றி பெற்றார். ஓட்டு விபரம் வருமாறு:-
தி.மு.க - 7,46,523
பா.ம.க. - 2,07,551
ம.நீ.ம. - 38,784
பெரும்பாலான தொகுதிகளில் பிரதான கட்சிகளை அடுத்த 3-ம் இடத்தை அ.ம.மு.க. பிடித்திருந்தது. சில தொகுதிகளில் 3-ம் இடத்தை மக்கள் நீதி மய்யமும், நாம் தமிழர் கட்சியும் கைப்பற்றி இருந்தன. அந்த வகையில் திண்டுக்கல் தொகுதியில் 3-ம் இடத்தை நாம் தமிழர் கட்சி வேட்பாளர் மன்சூர்அலிகான் பிடித்திருந்தார்.
ஏற்கனவே தேர்தல் பிரசாரத்தின் போது நூதன முறையில் சாலையோர வியாபாரிகளுடன் அமர்ந்தும், டீக்கடைகளில் டீ போட்டும், புரோட்டா கடைகளில் மாவு தயாரித்து கொடுத்ததும் பிரசாரம் செய்து பரபரப்பை ஏற்படுத்தினார் என்பது குறிப்பிடத்தக்கது.
