மேட்டூர் அணைக்கு நீர்வரத்து மேலும் சரிவு

சேலம்:

மேட்டூர் அணைக்கு நேற்று 97 கன அடியாக இருந்த நீர்வரத்து இன்று மேலும் சரிந்து 28 கன அடியாக வந்து கொண்டிருக்கிறது.

அணையில் இருந்து 1000 கன அடி தண்ணீர் காவிரி ஆற்றில் திறந்து விடப்பட்டு வருகிறது. அணைக்கு வரும் தண்ணீரை விட அணையில் இருந்து பல மடங்கு கூடுதல் தண்ணீர் திறந்து விடப்படுவதால் அணையின் நீர்மட்டம் வேகமாக சரிந்து வருகிறது.

நேற்று 48.45 அடியாக இருந்த மேட்டூர் அணை நீர்மட்டம் இன்று மேலும் சரிந்து 48.29 அடியானது. இதே நிலை நீடித்தால் இனி வரும் நாட்களில் மேட்டூர் அணை நீர்மட்டம் மேலும் வேகமாக சரிய வாய்ப்புள்ளது.

மேட்டூர் அணையில் தற்போது 48 அடிக்கும் மேல் தண்ணீர் உள்ளதால் மேட்டூர் அணையை நம்பியுள்ள கூட்டு குடிநீர் திட்ட பகுதிகளில் ஒன்றரை மாதத்திற்கு குடிநீர் தட்டுப்பாடு வராது என அதிகாரிகள் தெரிவித்தனர்.