திண்டுக்கல்:
பாராளுமன்ற துணை சபாநாயகர் தம்பிதுரை திண்டுக்கல் அருகே மாரம்பாடியில் நடைபெற்ற நிகழ்ச்சியில் பங்கேற்க வந்தார். அவர் அப்போது நிருபர்களிடம் கூறியதாவது:-
தமிழகத்துக்கு கிடைக்க வேண்டிய ரூ.9 ஆயிரம் கோடிக்கும் அதிகமான நிதியை மத்திய அரசு வழங்கவில்லை. மத்திய மந்திரி பொன்.ராதாகிருஷ்ணன் தமிழகத்திற்கு அதிக நிதி ஒதுக்கீடு செய்யப்பட்டுள்ளதாக கூறுவதை ஏற்க முடியாது.
நிலுவைத் தொகை மற்றும் கஜா புயல் பாதிப்புகளுக்கு ரூ.15 ஆயிரம் கோடி தமிழகத்தின் சார்பில் கேட்கப்பட்டது. ஆனால் எதுவும் கிடைக்கவில்லை. தமிழக உரிமைகளுக்காக குரல் எழுப்பி வருவதால் என் மீது பா.ஜ.க. அமைச்சர் மற்றும் நிர்வாகிகள் குறைகூறலாம். தமிழகத்தின் சமூக நீதியை காக்க 69 சதவீத இடஒதுக்கீடு கொண்டுவர மத்திய அரசு முயற்சி எடுக்கவில்லை.
இதேபோல் தமிழக நலனுக்காக மக்களவையில் குரல் எழுப்பிய அ.தி.மு.க. எம்.பி.க்கள் 34 பேர் மீது நடவடிக்கை எடுத்து சஸ்பெண்டு செய்துள்ளனர். ஆனால் நாடாளுமன்றத்தில் குரல் எழுப்பிய காங்கிரஸ், சமாஜ்வாடி கட்சியினர் மீது எந்த நடவடிக்கையும் எடுக்கவில்லை.
ஒரு எம்.பி. சஸ்பெண்டு செய்யப்பட்டால் அந்த நடவடிக்கையை மறுபரிசீலனை செய்ய பிற கட்சி எம்.பி.க்கள் வலியுறுத்துவது வழக்கம். ஆனால் அ.திமு.க. எம்.பி.க்கள் மீதான சஸ்பெண்டு நடவடிக்கையை ரத்து செய்ய எந்தஒரு கட்சியினரும் ஆதரவு தரவில்லை. இதன் மூலம் தமிழகம் எந்த அளவுக்கு புறக்கணிக்கப்படுகிறது என்பது தெரிய வருகிறது.
அ.தி.மு.க.வுடன் கூட்டணி அமைக்க விரும்பும் பா.ஜ.க. எம்.பி.க்களும் இந்த நடவடிக்கையை ரத்து செய்ய எந்த முயற்சியும் எடுக்கவில்லை. தேர்தல் அறிவிக்கப்படாததால் கூட்டணி குறித்து முடிவு செய்யவில்லை.
ராகுல்காந்தியை பிரதமர் வேட்பாளராக மு.க.ஸ்டாலின் அறிவித்துள்ளார். ஆனால் அதற்கு எதிரான நிலையில் உள்ள மம்தா பானர்ஜி நடத்தும் கூட்டத்திற்கு சென்றுள்ளார். இதன் மூலம் தி.மு.க.- காங்கிரஸ் கூட்டணியில் பிணக்கு ஏற்பட்டுள்ளது தெரிய வந்துள்ளது. மு.க.ஸ்டாலின் 3-வது அணிக்கு விரைவில் சென்று விடுவார்.
இவ்வாறு அவர் கூறினார். #ADMK #ThambiDurai #MKStalin
