மேட்டூர்:
காவிரி நீர்ப்பிடிப்பு பகுதிகளில் மழை இல்லாததாலும் கர்நாடக அணைகளில் இருந்து தண்ணீர் திறப்பு வெகுவாக குறைக்கப்பட்டுள்ளதாலும் மேட்டூர் அணைக்கு வரும் நீர்வரத்து குறைந்து கொண்டே வருகிறது.
கடந்த 2 நாட்களாக 7 ஆயிரம் கன அடி தண்ணீர் வந்து கொண்டிருக்கிறது. நேற்று 7 ஆயிரத்து 330 கன அடி தண்ணீர் வந்து கொண்டிருந்தது. இன்று காலை இது 7 ஆயிரத்து 522 கன அடியாக அதிகரித்தது.
காவிரி டெல்டா பாசனத்திற்காக மேட்டூர் அணையில் இருந்து 22 ஆயிரம் கன அடி தண்ணீரும் கால்வாய் பாசனத்திற்கு 800 கன அடி தண்ணீரும் திறந்து விடப்படுகிறது.
அணைக்கு வரும் நீர்வரத்தை விட பாசனத்திற்காக திறந்து விடப்படும் தண்ணீரின் அளவு அதிகமாக உள்ளதால் மேட்டூர் அணை நீர்மட்டம் வேகமாக சரிந்து வருகிறது.
நேற்று 114.98 அடியாக இருந்து நீர்மட்டம் இன்று காலை 114.08 அடியாக குறைந்துள்ளது.
கடந்த 9 நாட்களில் அணையின் நீர்மட்டம் 6 அடி குறைந்துள்ளது குறிப்பிடத்தக்கது. #MetturDam
