திருச்செங்கோடு:
மேட்டூர் அணையில் இருந்து விநாடிக்கு 2 லட்சம் கன அடி தண்ணீர் காவிரி ஆற்றில் திறந்து விடப்பட்டுள்ளது. இதனால் காவிரி ஆற்றில் வெள்ளப்பெருக்கு ஏற்பட்டுள்ளது.
தொடர் வெள்ளப்பெருக்கால் சேலம், நாமக்கல் மாவட்டங்களில் கரையோர பகுதிகளில் வெள்ளம் சூழ்ந்துள்ளது. இதனால் அந்த பகுதிகளில் வசித்து வந்த பொதுமக்கள் நிவாரண முகாம்களில் தங்கவைக்கப்பட்டுள்ளனர்.
அதுபோல் காவிரி ஆற்றங்கரையோரம் பயிரிடப்பட்ட வாழை, வெற்றிலை, மரவள்ளிக் கிழங்கு, தென்னை மர தோட்டங்களில் வெள்ளம் புகுந்து ஓடுவதால் பயிர்கள் அழுகும் நிலை ஏற்பட்டுள்ளது. நீரில் உள்ள பல பயிர்கள் வேரோடு சாய்ந்துள்ளன. இந்த பயிர்கள் வேரோடு ஆற்றில் இழுத்துச் செல்லப்படுகின்றன.
பள்ளிபாளையம் அருகே உள்ள கொக்கராயன்பேட்டை வழியாக காவிரி ஆறு செல்கிறது. இந்த கரையோரம் இருக்கும் கார்த்தி என்பவரது தென்னை மரத்தோட்டத்தில் நேற்று இரவு வெள்ளம் புகுந்தது.
தோட்டத்தில் நின்ற நாய் ஒன்று இந்த எதிர்பாராத வெள்ளத்தில் சிக்கிக் கொண்டது. அது தப்பிக்க முடியாமல் வெள்ளத்தில் அங்கும், இங்குமாக தத்தளித்துக் கொண்டிருந்தது.
நேரம் செல்ல செல்ல தோட்டத்தில் நீரின் அளவு உயர்ந்தது. நீரோட்டமும் அதிகரித்தது. இதனால் நாய் நீந்திச் சென்று தென்னை மரஉச்சியில் ஏறி மட்டைக்கு இடையில் பதுங்கி இருந்து கொண்டது.
மேலும் காப்பாற்ற வேண்டி அபாய குரல் எழுப்பியது. தொடர்ந்து குரைத்து கொண்டிருந்தது. இதை பார்த்த பொதுமக்கள் திருச்செங்கோடு தீயணைப்பு நிலையத்துக்கு தகவல் கொடுத்தனர். தீயணைப்பு நிலைய வீரர்கள் விரைந்து வந்து பார்த்தனர்.
அப்போது தோட்டத்தில் தென்னை மர உச்சி வரை வெள்ளம் பெருக்கெடுத்து சீறி பாய்ந்து சென்றதால், வீரர்களால் உடனடியாக வெள்ளத்தில் இறங்கி செல்ல முடியவில்லை. இதையடுத்து 2 மரத்திற்கு இடையே கயிறு கட்டியபடி, ரப்பர் படகு மூலமாக சென்று தென்னை மர உச்சியில் இருந்த நாயை உயிருடன் பத்திரமாக மீட்டு கொண்டு வந்தனர். சுமார் 4 மணி நேர போராட்டத்திற்கு பிறகு நாய் மீட்கப்பட்டது என்பது குறிப்பிடத்தக்கது. #tamilnews
