search icon
என் மலர்tooltip icon

    செய்திகள்

    மழைநீர் கால்வாயில் வீசப்பட்ட பச்சிளம் ஆண் குழந்தை உயிருடன் மீட்பு - ‘சுதந்திரம்’ என பெயர் சூட்டிய பொதுமக்கள்
    X

    மழைநீர் கால்வாயில் வீசப்பட்ட பச்சிளம் ஆண் குழந்தை உயிருடன் மீட்பு - ‘சுதந்திரம்’ என பெயர் சூட்டிய பொதுமக்கள்

    வளசரவாக்கத்தில், பிறந்து சிலமணி நேரமே ஆன நிலையில் மழைநீர் கால்வாயில் வீசப்பட்ட பச்சிளம் ஆண் குழந்தையை உயிருடன் மீட்ட பொதுமக்கள், அந்த குழந்தைக்கு சுதந்திரம் என பெயர் சூட்டினர்.
    பூந்தமல்லி:

    சென்னை வளசரவாக்கம் எஸ்.வி.எஸ். நகர், 6-வது தெருவில் ஏராளமான அடுக்குமாடி குடியிருப்புகள் உள்ளன. அங்குள்ள ஒரு அடுக்குமாடி குடியிருப்பின் அருகே மழைநீர் செல்ல சிறிய அளவிலான கால்வாய் அமைக்கப்பட்டு உள்ளது.

    நேற்று காலை அந்த அடுக்குமாடி குடியிருப்புகளில் உள்ளவர்களுக்கு வழக்கமாக பசும்பால் கொடுக்க வரும் பால்காரர் சுப்பையா என்பவர் வந்தார். அப்போது அந்த மழைநீர் கால்வாயை சுற்றி ஏராளமான பூனைகள் நின்று கொண்டிருப்பதை கண்டார்.

    மேலும் பச்சிளம் குழந்தையின் அழுகுரலும் கேட்டதால் சந்தேகம் அடைந்த அவர், பூனைகளை விரட்டி விட்டு பார்த்தபோது, மழைநீர் கால்வாயின் உள்ளே பச்சிளம் குழந்தை தனது இரண்டு கால்களை உதைத்தபடி உயிருடன் இருப்பதை கண்டு அதிர்ச்சி அடைந்தார்.

    உடனே சுப்பையா, கூச்சலிட்டார். அவரது சத்தம்கேட்டு அந்த குடியிருப்பில் இருந்த பொதுமக்கள் ஓடிவந்து பார்த்தனர். இதுபற்றி போலீசாருக்கு தகவல் கொடுத்தனர். ஆனால் அதற்குள், அந்த அடுக்குமாடி குடியிருப்பில் வசித்துவரும் கீதா என்ற பெண், தரையில் படுத்துக்கொண்டு மழைநீர் கால்வாய்க்குள் கையைவிட்டு இரண்டு கால்களையும் பிடித்து நைசாக குழந்தையை உயிருடன் வெளியே மீட்டெடுத்தார்.

    அதில், பிறந்து சில மணிநேரமே ஆன ஆண் குழந்தை என்பதும், அதன் தொப்புள் கொடிகூட அறுக்கப்படாமல் குழந்தையின் கழுத்தை சுற்றியபடி இருந்தது. கழுத்தில் சுற்றி இருந்த தொப்புள் கொடியை அகற்றி, ஒரு கிளிப் போட்டனர்.

    மழைநீர் கால்வாய்க்குள் கிடந்ததால் சேறும், சகதியுமாக இருந்த குழந்தையை அந்த பகுதி பெண்கள் சுடுநீரில் குளிப்பாட்டி சுத்தப்படுத்தி, புதிய துணி அணிவித்தனர். பசியால் குழந்தை தொடர்ந்து கதறி அழுதபடியே இருந்தது.

    அந்த பகுதியில் இருந்த குழந்தை பெற்ற பெண்கள், கருணை உள்ளத்தோடு அந்த குழந்தைக்கு தாய்ப்பால் வழங்கினார். அந்த தாய்ப்பால் முழுவதையும் சேகரித்து அந்த குழந்தைக்கு வழங்கி அதன் பசியை போக்கினர்.

    இதையடுத்து சம்பவ இடத்துக்கு வந்த வளசரவாக்கம் போலீசார், அந்த பச்சிளம் ஆண் குழந்தையை மீட்டு போரூரில் உள்ள அரசு ஆரம்ப சுகாதார நிலையத்துக்கு கொண்டு சென்று சிகிச்சை அளித்தனர். பின்னர் குழந்தையின் உடல் நலன் கருதி சென்னை எழும்பூரில் உள்ள குழந்தைகள் நல மருத்துவமனையில் அனுமதித்து அங்கு சிகிச்சை அளிக்கப்பட்டு வருகிறது.

    அங்கு குழந்தையை பரிசோதித்து பார்த்த டாக்டர்கள், குழந்தை நலமாக உள்ளதாக தெரிவித்தனர். அந்த செய்தியை கேட்டு அந்த குழந்தையை கால்வாயில் இருந்து மீட்டெடுத்த பொதுமக்கள் மகிழ்ச்சி அடைந்தனர்.

    சுதந்திர தினத்தில் குழந்தை மீட்கப்பட்டு உள்ளதால் அந்த குழந்தைக்கு ‘சுதந்திரம்’ என பெயர் சூட்டினார்கள். அந்த குழந்தை வீசப்பட்ட பகுதியில் ஒரு கண்காணிப்பு கேமரா உள்ளது. ஆனால் அங்கு வேன் நிறுத்தி வைக்கப்பட்டு இருந்ததால், பச்சிளம் குழந்தையை மழைநீர் கால்வாயில் வீசி சென்ற நபரின் உருவம் அதில் பதிவாகவில்லை.

    நேற்று காலைதான் அந்த குழந்தையை அந்த மழைநீர் கால்வாயில் வீசி உள்ளனர். நேற்று முன்தினம் இரவு விடிய, விடிய மழை பெய்ததால், மழைநீருடன் குழந்தை அடித்துச்செல்லப்பட்டு விடும் என்று வீசி உள்ளனர். மேலும் குழந்தையின் கழுத்தை தொப்புள் கொடியால் நெரித்ததற்கான தடயமும் இருந்ததாக போலீசார் தெரிவித்தனர்.

    மழைநீர் கால்வாயில் அந்த குழந்தையை வீசியது யார்?, அந்த குழந்தையின் பெற்றோர் யார்?, தவறான உறவால் பிறந்த குழந்தை என்பதால் இவ்வாறு மழைநீர் கால்வாயில் வீசினார்களா? என்பது குறித்து வளசரவாக்கம் போலீசார் விசாரித்து வருகின்றனர்.

    இந்த சம்பவத்தை அடுத்து அந்த கால்வாயில் வலைகள் வைத்து அடைக்கப்பட்டது. இந்த சம்பவம் அந்த பகுதியில் பெரும் பரபரப்பை ஏற்படுத்தியது. 
    Next Story
    ×