ஐபிஎல் 2019 சீசன் திருவிழா கடந்த மாதம் 23-ந்தேதி தொடங்கி தொடர்ச்சியாக நடைபெற்று வருகிறது. இன்று மும்பை வான்கடே மைதானத்தில் மும்பை இந்தியன்ஸ் - சென்னை சூப்பர் கிங்ஸ் அணிகள் பலப்பரீட்சை நடத்துகின்றன.
இரு அணிகளும் தலா மூன்று முறை சாம்பியன் பட்டத்தை வென்றுள்ளன. மூன்று முறை சாம்பியன் பட்டம் வென்ற அணிகள் நேருக்குநேர் மோதுவதால் இந்த போட்டிக்கான எதிர்பார்ப்பு அதிகரித்துள்ளது. கால்பந்து கிரிக்கெட்டில் ரியல் மாட்ரிட் - பார்சிலோனா அணிகள் மோதும் ஆட்டம் மிகப்பெரிய போட்டியாக கருதப்படும். அந்த ஆட்டத்தை ‘எல் கிளாசிகோ’ என்று அழைப்பர்.
அதேபோன்றுதான் மும்பை இந்தியன்ஸ் - சென்னை சூப்பர் கிங்ஸ் இடையிலான ஆட்டம் மிகப்பெரியது என்று ரோகித் சர்மா தெரிவித்துள்ளார்.
மும்பை இந்தியன்ஸ் கேப்டன் ரோகித் சர்மா கூறுகையில் ‘‘ஐபிஎல் தொடர் எப்போதுமே ஒரு திருவிழாதான். ஐபிஎல் தொடரில் பங்கேற்றுள்ள வீரர்களிடம் இதுகுறித்து நான் பேசியபோது, உலகின் மிகப்பெரிய தொடர் என்பதைத்தான் நான் கேட்டுள்ளேன். இந்திய ரசிகர்கள் மூர்க்கத்தானமாக நேசிக்கிறார்கள்.
இன்னும் ஐந்து அல்லது 10 ஆண்டுகளில் லிவர்பூல் vs மான்செஸ்டர் யுனைடெட், ‘எல் கிளாசிகோ’ ஆட்டம் போன்று மும்பை இந்தியன்ஸ் - சென்னை சூப்பர் கிங்ஸ் போட்டி பார்க்கப்படும்.
சென்னை சூப்பர் கிங்ஸ் அணி மிகவும் வெற்றிகரமான அணிகளில் ஒன்று. இது அவர்களுடைய 10-வது வருடம். கடந்த 9 முறையும் பிளே-ஆஃப் சுற்றுக்கு முன்னேறியுள்ளது. அவர்களும் நாங்களும் தலா மூன்று முறை சாம்பியன் பட்டம் வென்றுள்ளோம்.
இரு அணிகளுக்கும் இடையிலான ஆட்டத்தை மிகப்பெரியது என்று நான் சொல்லமாட்டேன். மக்கள் அதை விரும்புகிறார்கள். இரு அணிகளும் மோதும்போது சண்டையிடுவது போன்று தோன்றும். இதனால் ஐபிஎல் சீசனில் அதிக ரசிகர்கள் பார்க்கும் போட்டியாக இது திகழ்கிறது’’ என்றார்.
