இந்தியா - வெஸ்ட் இண்டீஸ் அணிகள் மோதும் முதல் 20 ஓவர் கிரிக்கெட் போட்டி கொல்கத்தா ஈடன் கார்டன் மைதானத்தில் இன்று இரவு 7 மணிக்கு தொடங்குகிறது. இந்திய அணி ஏற்கனவே டெஸ்ட் தொடரை 2-0 என்ற கணக்கிலும், ஒருநாள் தொடரை 3-1 என்ற கணக்கிலும் கைப்பற்றி இருந்தது.
இதேபோல் 20 ஓவர் தொடரையும் இந்திய அணி கைப்பற்றுமா? என்று ஆவலுடன் எதிர்பார்க்கப்படுகிறது. கோலிக்கு ஓய்வு கொடுக்கப்பட்டுள்ளதால் ரோகித் சர்மா அணியை வழி நடத்துகிறார். டோனி நீக்கப்பட்டதால் அவர் இடத்தில் ரிசப்பண்ட் விளையாடுவார்.
3 போட்டிக்கொண்ட இந்த 20 ஓவர் தொடரில் ரோகித் சர்மா புதிய சாதனை படைப்பாரா? என்று ஆவலுடன் எதிர்பார்க்கப்படுகிறது.
20 ஓவர் சர்வதேச போட்டியில் அதிக ரன் எடுத்துள்ளவர் மார்டின் கப்தில். நியூசிலாந்தை சேர்ந்த அவர் 73 இன்னிங்சில் 2271 ரன் எடுத்துள்ளார். சராசரி 34.40 ஆகும். இரண்டு சதமும், 14 அரை சதமும் அடித்துள்ளார். அதிகபட்சமாக 105 ரன் எடுத்துள்ளார்.
ரோகித் சர்மா 77 இன்னிங்சில் 2086 ரன் எடுத்து 5-வது இடத்தில் உள்ளார். சராசரி 32.59 ஆகும். 3 சதமும், 15 அரை சதமும் எடுத்துள்ளார். அதிகபட்சமாக 118 ரன் குவித்துள்ளார்.
கப்திலின் சாதனையை முறியடித்து புதிய சாதனை நிகழ்த்த ரோகித் சர்மாவுக்கு 186 ரன்களே தேவை. தொடக்க வீரரான அவர் தற்போது நல்ல நிலையில் இருக்கிறார். வெஸ்ட் இண்டீஸ்க்கு எதிரான ஒருநாள் போட்டித் தொடரில் ரோகித் சர்மா 389 ரன்கள் குவித்து 2-வது இடத்தை பிடித்தார்.
மேலும் வீராட் கோலி 20 ஓவர் தொடரில் ஆடாததால் அவருக்கு நல்ல வாய்ப்பு இருக்கிறது. கோலி 20 ஓவர் ஆட்டத்தில் 2102 ரன் எடுத்து 4-வது இடத்தில் உள்ளார். அவரை முந்த ரோகித் சர்மாவுக்கு 17 ரன்களே தேவை. இன்றைய ஆட்டத்திலேயே அவர் கோலியை முந்தி அதிக ரன் எடுத்த இந்திய வீரர் என்ற சாதனையை படைப்பார். கப்திலையும் முந்தி அதிக ரன் எடுத்த வீரர் என்ற சாதனையையும் படைக்க ரோகித்சர்மாவுக்கு வாய்ப்பு ஏற்பட்டுள்ளது.
