இங்கிலாந்து - ஆஸ்திரேலியா இடையிலான ஐந்து போட்டிகள் கொண்ட ஒருநாள் கிரிக்கெட் தொடரின் 5-வது மற்றும் கடைசி போட்டி மான்செஸ்டரில் நடைபெற்றது. டாஸ் வென்ற ஆஸ்திரேலியா பேட்டிங் தேர்வு செய்தது.
முதலில் பேட்டிங் செய்த ஆஸ்திரேலியா 34.4 ஓவர்கள் மட்டுமே தாக்குப்பிடித்து 205 ரன்னில் சுருண்டது. டிராவிஸ் ஹெட் 56 ரன்களும், அலெக்ஸ் கேரி 44 ரன்களும், ஆர்கி ஷார்ட் அவுட்டாகாமல் 47 ரன்களும் எடுத்தனர். இங்கிலாந்து பந்துவீச்சில் மோயீன் அலி 4 விக்கெட்களும், சாம் குர்ரன் 2 விக்கெட்களும் வீழ்த்தினர்.
நான்கு விக்கெட் வீழ்த்திய மோயீன் அலி
இதையடுத்து 206 ரன்கள் எடுத்தால் வெற்றி என்ற இலக்குடன் இங்கிலாந்து அணி பேட்டிங் செய்தது. அந்த அணியின் தொடக்க ஆட்டக்காரர்களாக ஜேசன் ராய், ஜானி பேர்ஸ்டோவ் ஆகியோர் களமிறங்கினர். ராய் ஒரு ரன் மட்டுமே எடுத்திருந்த நிலையில் அகார் பந்தில் போல்டாகி வெளியேறினார். அதன்பின் அலெக்ஸ் ஹேல்ஸ் களமிறங்கினார்.
பேர்ஸ்டோவ் 12 ரன்னில் ஆட்டமிழந்தார். அவரைத்தொடர்ந்து வந்த ஜோ ரூட் 1 ரன்னிலும், இயான் மார்கன் டக்-அவுட்டும் ஆகினர். ஹேல்ஸ் 20 ரன்னில் ஆட்டமிந்தார். இதனால் 50 ரன்களுக்கு இங்கிலாந்து அணி 5 விக்கெட்களை இழந்தது. அதன்பின் களமிறங்கிய ஜோஸ் பட்லர் நிதானமாக விளையாடினார். ஆனால் எதிர்முனையில் களமிறங்கியவர்கள் சொதப்பினர்.
மோயின் அலி 16 ரன்களிலும், சாம் குர்ரன் 15 ரன்களிலும், லியாம் பிளங்கீட் கோல்டன் டக்-அவுட்டும் ஆகினர். அப்போது 29.4 ஓவரில் இங்கிலாந்து அணி 8 விக்கெட் இழப்பிற்கு 114 ரன்கள் மட்டுமே எடுத்தது. நிதானமாக விளையாடிய பட்லர் அரைசதம் அடித்தார். மற்றொரு முனையில் அடில் ரஷித் விக்கெட் விழாமல் பார்த்துகொண்டார்.
சதம் அடித்த மகிழ்ச்சியில் ஜோஸ் பட்லர்
சிறப்பாக பேட்டிங் செய்துவந்த ரஷித் 47 பந்தில் 20 ரன்கள் எடுத்திருந்த நிலையில் ஆட்டமிழந்தார். மற்றொரு முனையில் சிறப்பாக விளையாடிய பட்லர் சதம் அடித்து அசத்தினார். இது சர்வதேச ஒருநாள் போட்டிகள் அவரது ஆறாவது சதமாகும். இறுதியில் இங்கிலாந்து அணி 48.3 ஓவரில் 9 விக்கெட் இழப்பிற்கு 208 ரன்கள் எடுத்து ஒரு விக்கெட் வித்தியாசத்தில் திரில் வெற்றி பெற்றது. பட்லர் 110 ரன்களுடன் ஆட்டமிழக்காமல் களத்தில் இருந்தார். ஆஸ்திரேலியா அணி பந்துவீச்சில் பில்லி ஸ்டான்லேக், கேன் ரிச்சர்ட்சன் ஆகியோர் தலா முன்று விக்கெட்களும், மார்கஸ் ஸ்டாயினிஸ் 2 விக்கெட்டும் வீழ்த்தினர்.
இந்த போட்டியில் சிறப்பாக விளையாடி சதம் அடித்து அணியை வெற்றிபெற செய்த பட்லர் ஆட்டநாயகன் விருது பெற்றார். இதன்மூலம் ஐந்து போட்டிகள் கொண்ட ஒருநாள் தொடரில் ஐந்திலும் வென்ற இங்கிலாந்து அணி ஆஸ்திரேலியாவை ஒயிட்-வாஷ் செய்தது. #AUSvENG #ENGvAUS
