இங்கிலாந்தைச் சேர்ந்த முன்னணி கால்பந்து வீரர் மார்கஸ் ரஷ்போர்டு. இங்கிலாந்தின் முன்னணி கிளப் அணியான மான்செஸ்டர் யுனைடெட் அணிக்காக விளையாடி வருகிறார். இங்கிலாந்து அணிக்காக 19 ஆட்டத்தில் பங்கேற்று 3 கோல் அடித்துள்ளார். மான்செஸ்டர் யுனைடெட் அணிக்காக கடந்த 2015-ல் இருந்து விளையாடி வருகிறார். 78 ஆட்டத்தில் 17 கோல்கள் அடித்துள்ளார்.
உலகக் கோப்பையில் இங்கிலாந்து அணிக்காக மிகப்பெரிய தாக்கத்தை ஏற்படுத்துபவராக கருதப்படும் முன்கள வீரரான ரஷ்போர்டு, கிறிஸ்டியானோ ரொனால்டோவை விட மெஸ்சி சிறந்த வீரர் என்று குறிப்பிட்டுள்ளார்.
இதுகுறித்து ரஷ்போர்டு கூறுகையில் ‘‘நான் மெஸ்சியை பற்றி சொல்ல வேண்டுமென்றால், சில விஷயங்கள் நம்ப முடியாத வகையில் இருக்கும். ரொனால்டோவின் சிறந்த ரசிகன் நான். நான் மெஸ்சியை விட சிறந்த வீரர் யாருமில்லை என்று நினைக்கிறேன். நான் இணைந்து விளையாடியதில் ரூனேதான் சிறந்த வீரர். அவர் ஒரு ஜாம்பவான். அதில் எந்தவித சந்தேகமும் இல்லை.
ரூனே உடன் ரஷ்போர்டு மான்செஸ்டர் யுனைடெட் அணிக்காக 2016-ல் ஒன்றரை சீசனில் விளையாடியுள்ளார். அப்போது எஃப்ஏ கோப்பை, லீக் கோப்பை, யூரோப்பா லீக், கம்யூனிட்டி ஷீல்டு ஆகியவற்றை மான்செஸ்டர் கைப்பற்றியுள்ளது.
