ஸ்பெயினில் நடைபெற்று வரும் லா லிகா கால்பந்து லீக்கில் பார்சிலோனா சிறப்பாக விளையாடி ஏற்கனவே சாம்பியன் பட்டத்தை உறுதி செய்துள்ளது.
பார்சிலோனா தனது சொந்த மைதானத்தில் 36-வது ஆட்டத்தில் விலாரியல் அணியை எதிர்கொண்டது. இதில் பார்சிலோனா 5-1 என வெற்றி பெற்றது. ஆட்டத்தின் 11-வது நிமிடத்தில் பிலிப்பே கவுட்டினோ, 16-வது நிமிடத்தில் பவுலினோ, 45-வது நிமிடத்தில் மெஸ்சி, 87 மற்றும் 93-வது நிமிடத்தில் ஓஸ்மானே டெம்பேல் அடுத்தடுத்து இரண்டு கோல்கள் அடித்தனர். விலாரியல் அணியின் சான்சோனே 54-வது நிமிடத்தில் ஒரு கோல் அடித்தார்.
பார்சிலோனா 2017-18 சீசனில் லா லிகாவில் 36 போட்டிகளில் விளையாடி 27 வெற்றி, 9 டிராவுடன் 90 புள்ளிகள் பெற்று முதல் இடத்தில் இருக்கிறது. இதுவரை தோல்வியை சந்திக்கவில்லை. ஐரோப்பிய கண்டத்தில் நடைபெறும் அனைத்து லீக் போட்டிகளையும் கணக்கில் எடுத்ததுக் கொண்டால், தோல்வியடையாத ஒரே அணி இதுதான். மீதமுள்ள இரண்டு போட்டிகளிலும் தோல்வியை சந்திக்காமல் இருந்தால் தோற்கடிக்க முடியாத அணி என்ற சாதனையை பார்சிலோனா சொந்தமாக்கும்.
லா லிகாவில் அட்லெடிகோ டி மாட்ரிட் 75 புள்ளிகளடன் 2-வது இடத்திலும், ரியல்மாட்ரிட் 72 புள்ளிகளுடன் 3-வது இடத்திலும் உள்ளது.
