புதுடெல்லி:
புதிதாக வீடு வாங்குபவர்கள் கட்டுமானப் பணிகள் நடைபெற்று வரும் வீடுகளை முன்பதிவு செய்து வாங்கும்போது வீட்டின் விலைமதிப்பில் 12 சதவீதம் தற்போது ஜி.எஸ்.டி. (சரக்கு மற்றும் சேவை) வரியாக வசூலிக்கப்படுகிறது. அதாவது, குடியேற தயார் என்று சான்றிதழை பெறாத - கட்டுமான வேலைகள் முற்றுப்பெறாத வீடுகளுக்கு இந்த வரிவிதிப்பு முறை செயல்பாட்டில் உள்ளது.
மேலும், கட்டி முடிந்து குடியேற தயாராக உள்ள வீடுகளின் (சென்னை உள்ளிட்ட பெருநகரங்களில் 60 சதுர மீட்டர், மற்றும் பிறநகரங்களில் 90 சதுர மீட்டர் பரப்பளவில் 45 லட்சம் ரூபாய் விலைக்கு உட்பட்ட வீடுகள்) விலைமதிப்பில் 8 சதவீதம் தற்போது ஜி.எஸ்.டி. வரியாக வசூலிக்கப்படுகிறது.
இந்நிலையில், இன்று டெல்லியில் மத்திய நிதி மந்திரி அருண் ஜெட்லி தலைமையில் கூடிய ஜி.எஸ்.டி. குழு கூட்டம் இந்த வரிவிதிப்பில் சில மாற்றங்களை செய்ய சம்மதித்துள்ளது.
இதைதொடர்ந்து, கட்டுமானத்தில் உள்ள வீடுகளுக்கான ஜி.எஸ்.டி. வரி 12-லிருந்து 5 சதவீதமாக குறைக்கப்படும். கட்டி முடிந்து குடியேற தயாராக உள்ள வீடுகளின் மீதான ஜி.எஸ்.டி. வரி 8-லிருந்து ஒரு சதவீதமாக குறைக்கப்படும்.
இந்த புதிய வரிவிதிப்பு முறை ஏப்ரல் மாதத்தில் இருந்து அமலுக்கு வரும் என மத்திய நிதி மந்திரி அருண் ஜெட்லி அறிவித்துள்ளார். இந்த அறிவிப்பின் மூலம் ரியல் எஸ்டேட் மட்டும் கட்டுமானத்துறை புதிய வளர்ச்சியை எட்டும் எனவும் அவர் நம்பிக்கை தெரிவித்தார்.
இதேபோல், லாட்டரி சீட்டு மீதான ஜி.எஸ்.டி. வரியும் குறைக்கப்பட வேண்டும் என்னும் பலதரப்பினரின் கோரிக்கை தொடர்பாக இன்றைய கூட்டத்தின்போது ஏதும் முடிவெடுக்கப்படவில்லை.
தற்போதைய நிலவரப்படி, சில மாநில அரசுகள் நடத்தும் லாட்டரி சீட்டுகள் மீது 18 சதவீதமும், மாநில அரசுகளின் அனுமதியுடன் விற்கப்படும் லாட்டரி சீட்டுகள் மீது 18 சதவீதமும் ஜி.எஸ்.டி. வரியாக விதிக்கப்படுவது குறிப்பிடத்தக்கது. #gst #gstflasts
