திருமலை:
ஆந்திர மாநில அறநிலையத்துறையின் கீழ் செயல்படும் திருமலை-திருப்பதி தேவஸ்தானம் ஒவ்வொரு ஆண்டும் பட்ஜெட் தாக்கல் செய்து வருகிறது. தற்போது 2019-2020ம் நிதி ஆண்டுக்கான பட்ஜெட் தாக்கல் செய்யப்பட்டுள்ளது. பட்ஜெட்டில் கூறியிருப்பதாவது:-
இந்த ஆண்டு உண்டியல் வருமானமாக ரூ.1,231 கோடி கிடைக்கும் என எதிர்பார்க்கப்படுகிறது. நிதி வைப்புகள் மூலம் கிடைக்கும் வட்டித்தொகை ரூ.845.86 கோடி, விரைவு தரிசனம் மற்றும் பிரேக் தரிசன டிக்கெட் விற்பனை மூலம் ரூ.235 கோடி, பிரசாத விற்பனை மூலம் ரூ.270 கோடி, காணிக்கை தலைமுடி விற்பனை மூலம் ரூ.100 கோடி, விடுதி அறைகள், கல்யாண மண்டபங்கள் மூலம் ரூ.105 கோடி, பங்கு வைப்புகள் மூலம் ரூ.67.54 கோடி வருமானம் கிடைக்கும் என எதிர்பார்க்கப்படுகிறது.
ஆர்ஜித சேவை டிக்கெட்கள் விற்பனை மூலம் ரூ.57 கோடி, ஓட்டல்கள், வணிக வளாகங்கள், கல்யாண மண்டபம் வாடகை, என்ஜினீயரிங் துறை, டோல்கேட் வரி வசூல், புத்தகம், டைரிகள், காலண்டர் ஆகியவை விற்பனை, கேண்டீன் வாடகை, கல்வி கட்டணம், தங்க டாலர்கள் விற்பனை மற்றும் இதர முதலீடுகள் மூலம் ரூ.204.85 கோடி வீதம் ஆண்டுக்கு மொத்தம் ரூ.3,116.25 கோடி வருமானம் கிடைக்கும் என எதிர்பார்க்கப்படுகிறது.
பிற முதலீட்டுச் செலவினம் ரூ.78.85 கோடி, ஊழியர்கள் சம்பளம் மற்றும் கூலி ரூ.625 கோடி ஒதுக்கப்பட உள்ளது. என்ஜினீயரிங் துறை சார்பில் மேற்கொள்ளப்படும் கட்டுமானப் பணிகளுக்கு இரும்பு தளவாட பொருட்கள் கொள்முதலுக்கு ரூ.541 கோடி செலவிடப்பட உள்ளது. மானியம் மற்றும் பங்களிப்புத் தொகை ரூ.283 கோடி, அசையா சொத்துக்களை பராமரிக்க ரூ.400 கோடி, ஆதார செலவினம் ரூ.339.58 கோடி, ஓய்வூதியம் மற்றும் பணிக்கொடை வழங்க ரூ.260 கோடி, ஓய்வூதியம் வழங்க ரூ.75 கோடி ஒதுக்கப்படுகிறது. மின் கட்டணமாக ரூ.52 கோடி செலுத்தப்படும். அசையா சொத்துக்களை பழுது பார்க்க ரூ.135 கோடி செலவிடப்பட உள்ளது.
கடன், ஊழியர்களுக்கு முன்பணம் செலுத்துதல் ஆகியவற்றுக்கு ரூ.52.11 கோடி செலவிடப்படுகிறது. விளம்பரம் ரூ.10 கோடி, பல்வேறு முதலீடு மற்றும் இதர செலவினத்துக்கு ரூ.264.21 கோடி ஒதுக்கப்பட உள்ளது.
இவ்வாறு அதில் கூறப்பட்டுள்ளது. #Tirupatitemple #Budget
