புதுடெல்லி:
இந்திய பாராளுமன்றத்தின் 16-வது மக்களவையின் ஆயுட்காலம் வரும் மே மாதத்துடன் நிறைவடைகிறது. 17-வது மக்களவைக்கான உறுப்பினர்களை தேர்வு செய்வதற்காக விரைவில் பாராளுமன்ற பொதுத்தேர்தல் நடைபெறவுள்ளது.
16-வது மக்களவையின் இறுதி (இடைக்கால) பட்ஜெட் சமீபத்தில் தாக்கல் செய்யப்பட்டு, ஜனாதிபதி உரைக்கு நன்றி தெரிவிக்கும் தீர்மானத்தின் மீது உறுப்பினர்கள் உரையாற்றி வருகின்றனர். இந்த பட்ஜெட் கூட்டத்தொடர் (நாளை) 13-ம் தேதியுடன் முடிவடைகிறது.
மீண்டும் பாராளுமன்ற தேர்தல் முடிந்து முடிவுகள் அறிவிக்கப்பட்ட பின்னர் 17-வது மக்களவை கூட்டம் வரும் மே அல்லது ஜூன் மாதவாக்கில் நடைபெறும் என எதிர்பார்க்கப்படுகிறது.
இந்நிலையில், காங்கிரஸ் பாராளுமன்ற உறுப்பினர்களின் பொதுக்குழு கூட்டம் நாளை டெல்லியில் நடைபெறுகிறது. இந்த கூட்டத்தில் காங்கிரஸ் தலைவர் ராகுல் காந்தி, முன்னாள் தலைவர் சோனியா ஆகியோர் உரையாற்றுகின்றனர்.
ஒவ்வொரு மக்களவை காலம் முடியும் தருவாயில் எம்.பி.க்களுக்கு வழியனுப்பு விழாபோல் இதுபோன்ற கூட்டங்கள் நடத்தப்படுவது மரபாக உள்ளது குறிப்பிடத்தக்கது. #CongressParliamentaryParty #ParliamentaryPartymeet
