போபால்:
மத்திய பிரதேசத்தில் 15 ஆண்டுகளுக்கு பிறகு காங்கிரஸ் ஆட்சியை பிடித்துள்ளது. பகுஜன்சமாஜ், சமாஜ்வாடி கட்சிகளின் ஆதரவுடன் காங்கிரஸ் ஆட்சி அமைக்கிறது. மத்திய பிரதேச முதல்- மந்திரியாக கமல்நாத் நாளை (17-ந்தேதி) பதவியேற்கிறார்.
பதவியேற்பு விழாவில் கலந்துகொள்ளுமாறு மேற்கு வங்காள முதல்-மந்திரி மம்தா பானர்ஜி, ஆந்திர முதல்-மந்திரி சந்திரபாபு நாயுடு, பகுஜன் சமாஜ் கட்சி தலைவர் மாயாவதி, சமாஜ்வாடி கட்சி தலைவர் அகிலேஷ் யாதவ் உள்ளிட்டோருக்கும், காங்கிரஸ் ஆளும் மாநில முதல்-மந்திரிகளுக்கும் கமல்நாத் அழைப்பு விடுத்துள்ளார்.
இதேபோல் முக்கிய தொழில் அதிபர்கள், மத துறவிகளும் நிகழ்ச்சியில் கலந்துகொள்ள இருக்கிறார்கள். எம்பி-யாக இருக்கும் கமல் நாத் சட்டசபை தேர்தலில் போட்டியிடவில்லை. இதனால் 6 மாதங்களுக்குள் அவர் தேர்தலில் வெற்றிபெற்று எம்எல்ஏ ஆக வேண்டும்.
சிந்துவாரா மாவட்டத்தில் உள்ள சவுன்சர் தொகுதியில் அவர் போட்டியிடுவது உறுதியாகி உள்ளது. இந்த தொகுதியில் காங்கிரஸ் 20,742 ஓட்டுகள் வித்தியாசத்தில் வெற்றி பெற்று இருந்தது. காங்கிரஸ் அதிக வாக்கு வித்தியாசத்தில் வென்ற தொகுதி என்பதால் இங்கு கமல்நாத் போட்டியிடுகிறார்.
