மும்பை:
மக்களவை மற்றும் அனைத்து மாநில சட்டசபைகளுக்கும் சேர்த்து தேர்தல் நடத்துவதற்கு பாஜக உள்ளிட்ட பல மாநில கட்சிகள் ஆதரவாக உள்ளது. தேர்தல் செலவுகள், மனிதவளம் ஆகியவை ஒரே தேர்தல் முறையில் குறையும் என இந்த திட்டத்தை ஆதரிக்கும் கட்சிகள் கூறுகின்றன.
ஆனால், மத்தியில் ஆட்சி கவிழும் பட்சத்தில் அனைத்து மாநில சட்டசபைகளையும் கலைத்து விட்டு மீண்டும் தேர்தல் நடத்துவீர்களா? என இந்த திட்டத்தை எதிர்பவர்கள் குரல் கொடுக்கின்றனர். திமுக, திரினாமுல், சிவசேனா, இடதுசாரிகள் என முக்கிய கட்சிகள் ஒரே நாடு ஒரே தேர்தல் என்ற திட்டத்தை எதிர்க்கின்றன.
இதற்கிடையே, பாஜக தேசிய தலைவர் அமித் ஷா நேற்று சட்ட கமிஷன் சென்று, ஒரே நாடு ஒரே தேர்தல் திட்டத்துக்கு பாஜக ஆதரவாக இருப்பதாக தெரிவித்து கடிதம் அளித்தார்.
இந்நிலையில், அமித் ஷாவின் கடிதம் தொடர்பாக கருத்து தெரிவித்துள்ள சிவசேனா எம்.பி சஞ்சய் ராவத், “அவர்கள் (பாஜக) பாராளுமன்றம் - அனைத்து மாநில சட்டசபைகளுக்கு ஒன்றாக தேர்தல் நடத்தலாம். இல்லையெனில், அமெரிக்கா, ரஷியாவுடன் சேர்ந்து இந்தியாவுக்கும் தேர்தல் நடத்த வேண்டும் என வலியுறுத்தலாம். பாஜக தலைவர்களின் தலையில் இருந்து என்ன வெளிவரும் என யாருக்கும் தெரியாது?” என கூறியுள்ளார்.
