பெங்களூரு :
கர்நாடக முன்னாள் முதல்வர் சித்தராமையா, அம்மாநிலத்தில் கூட்டணி ஆட்சியில் உள்ள மதச்சார்பற்ற ஜனதா தளம் மற்றும் காங்கிரஸ் கட்சி எம்.எல்.ஏ.க்கள் ஒருங்கிணைப்பு குழுவின் தலைவராக உள்ளார்.
இந்நிலையில், தனது சட்டமன்ற தொகுதியான பதாமி தொகுதியில் 5 நாள் சுற்றுப்பயணம் மேற்கொண்டுள்ள சித்தராமையா, இன்று செய்தியாளர்களை சந்தித்தார். அப்போது, மஜத - காங் கூட்டணி எம்.எல்.ஏ.க்களின் முதல் ஒருங்கிணைப்பு குழு கூட்டம் ஜூன் 14-ம் தேதி நடைபெற உள்ளது என்றும், இந்த கூட்டத்தில் முக்கியமானதாக விவாதிக்கக்கூடிய விவகாரங்கள் என்ன என்பது பற்றி நாளை முடிவு செய்யப்படும் என்றும் தெரிவித்தார்.
மேலும், சமீபத்திய மந்திரிசபை விரிவாக்கத்தில், மந்திரி பதவி கிடைக்காத சில காங்கிரஸ் எம்.எல்.ஏக்கள் அதிருப்தியில் இருப்பதாக கேட்கப்பட்ட கேள்விக்கு பதிலளித்த அவர், காங்கிரஸ் கட்சியில் தற்போது யாரும் அதிருப்தியாக இல்லை அனைவரும் ஒற்றுமையாக உள்ளோம் என கூறினார். #Siddaramaiah
