சென்னை:
பாராளுமன்ற தேர்தல் நாள் நெருங்கி வருவதால் தமிழகம் முழுவதும் வாகன சோதனை தீவிரப்படுத்தப்படுகிறது. வாக்காளர்களுக்கு பணமோ, அன்பளிப்போ அரசியல் கட்சியினர் கொடுக்கிறார்களா என்பது கண்காணிக்கப்படுகிறது. இரவு பகலாக பறக்கும் படையினர் கார், பஸ், வேன் மற்றும் சரக்கு வாகனங்களில் சோதனை செய்து வருகின்றனர்.
மோட்டார் சைக்கிளில் சந்தேகப்படும்படி சென்றால் கூட அவர்களை நிறுத்தி உடமைகளை ஆய்வு செய்கின்றனர். தேர்தல் ஆணையத்தின் உத்தரவின் பேரில் போலீசார் உதவியுடன் பறக்கும் படை அதிகாரிகள் சோதனை நடத்தி வரும் நிலையில் ஒரே நாளில் ரூ.11 கோடி ரொக்கம் சிக்கியுள்ளது. உரிய ஆவணங்கள் இல்லாமல் வாகனத்தில் எடுத்து செல்லப்பட்ட பணத்தை போலீசார் கைப்பற்றி கருவூலத்திற்கு அனுப்பி வைத்துள்ளனர்.
இதேபோல் 33 கிலோ தங்க நகைகளும் பறிமுதல் செய்யப்பட்டுள்ளன. அவற்றின் விவரம் வருமாறு:-
சென்னை வால்டாக்ஸ் சாலையில் நடந்த வாகன சோதனையில் காரில் கொண்டு செல்லப்பட்ட 6 கிலோ தங்கம் சிக்கியது. இதற்கு உரிய ஆவணம் இல்லாததால் பறிமுதல் செய்யப்பட்டன. பூக்கடை பகுதியில் நடத்திய சோதனையில் 2 கிலோ தங்கம் கைப்பற்றப்பட்டது. மேலும் ரூ.30 லட்சம் ரொக்கமும் பறிமுதல் செய்யப்பட்டன.
புரசைவாக்கத்தில் உரிய ஆவணம் இன்றி எடுத்து செல்லப்பட்ட ரூ.31 லட்சம் கைப்பற்றப்பட்டது. பெரம்பூரில் வக்கீல் அருள் பிரகாசம் என்பவரிடம் ரூ.4 லட்சம் கைப்பற்றப்பட்டது. சென்னையில் நேற்று ஒரே நாளில் 8 கிலோ தங்கம் ரூ.66 லட்சம் மற்றும் 83 கிலோ வெள்ளி பொருட்களை பறக்கும் படையினர் பறிமுதல் செய்தனர்.
சேலம் மாவட்டம் தாரமங்கலத்தில் ஏ.டி.எம். மையத்தில் பணம் நிரப்புவதற்காக கொண்டு செல்லப்பட்ட ரூ.1 கோடியே 83 லட்சம் உரிய ஆவணங்கள் இல்லாததால் பறிமுதல் செய்யப்பட்டன.
மேலும் தாரமங்கலத்தில் உள்ள ஓட்டல் அதிபரிடம் இன்று காலை ரூ. 1 லட்சத்து 15 ஆயிரம் கைப்பற்றப்பட்டது. சேலம் செவ்வாப்பேட்டையில் இருந்து சென்னைக்கு ஆம்னி பஸ்சில் கொண்டு சென்ற 13 கிலோ வெள்ளி, வாகன சோதனையில் பிடிபட்டது.
திருச்சியில் இருந்து மதுரைக்கு கொண்டு செல்லப்பட்ட வங்கி பணம் வாகன சோதனையில் சிக்கியது. அதில் ரூ.4½ கோடி இருந்துள்ளது. உரிய ஆவணம் இல்லாததால் கருவூலத்தில் அந்த பணம் ஒப்படைக்கப்பட்டது.
சிவகங்கை மாவட்ட தி.மு.க. துணை செயலாளர் ரூ.1 லட்சம் ரொக்கப் பணத்துடன் இன்று பிடிபட்டார்.
தேனியில் நடந்த சோதனையில் தனியார் வங்கிக்கு கொண்டு செல்லப்பட்ட ரூ.60 லட்சம் கைப்பற்றப்பட்டது. உரிய ஆவணம் இல்லாததால் அதனை அதிகாரிகள் கலெக்டர் அலுவலகத்திற்கு கொண்டு சென்றனர்.
விருதுநகரில் நடந்த சோதனையில் முட்டை வியாபாரி குருசாமியிடம் இருந்து ரூ.1 லட்சத்து 30 ஆயிரம் கைப்பற்றப்பட்டது.
தஞ்சாவூரில் பல்வேறு இடங்களில் நடத்தப்பட்ட சோதனையில் ரூ.1 கோடியே 64 லட்சம் கைப்பற்றப்பட்டது. 2 வேன்களில் தனியார் வங்கி ஏ.டி.எம்.மையங்களுக்கு கொண்டு செல்லப்பட்ட பணம் பிடிபட்டது. வங்கி பணத்தை எடுத்து சென்ற போது உரிய ஆவணங்கள் இல்லாததால் பறிமுதல் நடவடிக்கை மேற்கொள்ளப்பட்டது.
தஞ்சாவூரை அடுத்த ஈச்சயகுடியில் நடந்த சோதனையில் வேனில் கொண்டு சென்ற ரூ.17 லட்சம் சிக்கியது. ஏ.டி.எம். மையத்திற்கு கொண்டு செல்லப்பட்ட பணம் என்றாலும் உரிய ஆவணம் இல்லாததால் பறிமுதல் செய்யப்பட்டன. பாபநாசம் அருகில் நடந்த சோதனையில் ரூ.8 லட்சம் சிக்கியது.
நாகை மாவட்டம் சீர்காழியில் நடந்த வாகன சோதனையில் ராஜசேகர் என்பவரிடம் ரூ.3½ லட்சம் பறிமுதல் செய்யப்பட்டது.
ஈரோடு மாவட்டத்தில் 7 இடங்களில் நடந்த சோதனையில் ரூ.1 கோடியே 45 லட்சம் சிக்கியது. கோபி செட்டிபாளையம் கோவில் உண்டியல் பணத்தை கொண்டு சென்ற போது உரிய ஆவணமின்றி பிடிபட்டது. இன்று காலையில் நம்பியூர் மற்றும் சத்தியமங்கலத்தில் நடந்த சோதனையில் ரூ.2 லட்சத்து 85 ஆயிரம் பிடிபட்டது.
நெல்லை மாவட்டத்தில் பறக்கும் படையினர் நடத்திய சோதனையில் ரூ.4 லட்சத்து 61 ஆயிரமும், தூத்துக்குடி மாவட்டத்தில் ரூ.5 லட்சத்து 27 ஆயிரமும் உரிய ஆவணம் இல்லாமல் கைப்பற்றப்பட்டது. சாத்தான்குளத்தில் அதிகாலை நடந்த வாகன சோதனையில் மணிராஜ், ஜெனிபன் ஆகியோரிடம் ரூ.2 லட்சத்து 51 ஆயிரம் கைப்பற்றப்பட்டது.
திருவண்ணாமலையில் நடந்த சோதனையில் மலேசியாவில் இருந்து வந்த சுற்றுலா பயணிகள் சிக்கினர். 2 வேன்களில் வந்த அவர்களிடம் இருந்து ரூ.3 லட்சத்து 70 ஆயிரம் பறிமுதல் செய்யப்பட்டன. சுற்றுலா பயணிகளிடம் பறிமுதல் செய்யப்பட்ட பணத்தை திருப்பி தர வேண்டும் என வலியுறுத்தினர்.
தொடர்ந்து வாகன சோதனை தீவிரப்படுத்தப்பட்டு வருகிறது. கையில் அதிக பணம் எடுத்து செல்லக்கூடாது என தேர்தல் ஆணையம் உத்தரவிட்டுள்ளது. ரூ.10 லட்சத்திற்கும் குறைவாக உரிய ஆவணத்துடன் எடுத்து செல்லலாம்.
