சென்னை:
அ.தி.மு.க-பா.ஜனதா கூட்டணியில் இடம் பெற்றுள்ள பாட்டாளி மக்கள் கட்சிக்கு மொத்தம் 8 தொகுதிகள் ஒதுக்கப்பட்டுள்ளன. அதாவது 7 மக்களவைத் எம்.பி. தொகுதிகளையும், ஒரு மாநிலங்களவை உறுப்பினர் பதவிக்கான இடத்தையும் அதிமுக ஒதுக்கி கொடுத்துள்ளது.
முன்னதாக பா.ம.க. கேட்ட சில தொகுதிகளை விட்டுக்கொடுக்க அ.தி.மு.க. தரப்பில் தயக்கம் காட்டப்பட்டது. இதையடுத்து பா.ம.க. தலைவர்களில் சிலர் தி.மு.க.வுடன் கூட்டணி சேருவதற்கான பேச்சுவார்த்தையை நடத்தினார்கள். ஆனால், தொகுதிகள் விஷயத்திலும், திமுக விதித்த நிபந்தனைகளாலும் பேச்சுவார்த்தையை தொடங்குவதில் பாமக தயக்கம் காட்டிவந்தது.
இதை அறிந்த அ.தி.மு.க-பா.ஜனதா தலைவர்கள் உடனே பா.ம.க.வை கூட்டணிக்குள் இழுக்கும் பணிகளை தொடங்கினர்.
“நீங்கள் கேட்கும் தொகுதிகளை தருகிறோம். செலவையும் பார்த்துக் கொள்கிறோம்” என்று அ.தி.மு.க.-பா.ஜனதா தரப்பில் இருந்து பா.ம.க.வுக்கு உறுதி அளிக்கப்பட்டதாக தெரிகிறது. இதைத் தொடர்ந்து அ.தி.மு.க. கூட்டணியில் இன்று பா.ம.க. ஐக்கியமாகி உள்ளது.
அ.தி.மு.க. தலைமையிலான கூட்டணியில் பாமகவுக்கு 1 மாநிலங்களவை எம்.பி. இடம் மற்றும் 7 மக்களவைத் தொகுதிகள் ஒதுக்கப்பட்டு அதிகாரப்பூர்வமாக ஒப்பந்தம் கையெழுத்திடப்பட்டுள்ளது.
இதைத் தொடர்ந்து தங்களுக்கு ஒதுக்க வேண்டிய தொகுதிகளின் பட்டியலையும் அ.தி.மு.க.விடம் பா.ம.க. தலைவர்கள் கொடுத்தனர். அதில் பா.ம.க. மொத்தம் 8 தொகுதிகளை குறிப்பிட்டுள்ளது. அந்த 8 தொகுதிகள் விவரம் வருமாறு:-
1. ஸ்ரீபெரும்புதூர்
2. மத்திய சென்னை
3. கடலூர்
4. அரக்கோணம்
5. கள்ளக்குறிச்சி
6. விழுப்புரம்
7. திருவள்ளூர்
8. காஞ்சீபுரம்
இந்த 8 தொகுதிகளில் இருந்து 7 தொகுதிகளை ஒதுக்கி தர பா.ம.க. தரப்பில் கூறப்பட்டுள்ளது.
பா.ம.க.வுக்கு 7 தொகுதிகளை விட்டுக்கொடுக்க முன்வந்துள்ள அ.தி.மு.க. அந்த 7 தொகுதிகளில் ஒரு தனி தொகுதியையும் ஒதுக்க முடிவு செய்துள்ளது. அதை பா.ம.க. ஏற்றிருப்பதாக தெரிய வந்துள்ளது.
இன்னும் ஓரிரு தினங்களில் பா.ம.க.வுக்கு ஒதுக்கப்படும் 7 தொகுதிகள் என்னென்ன என்பது தெரிந்து விடும். #LSPolls #ADMK #PMKConstituencies
