நம்பியூர்:
ஈரோடு மாவட்டம் நம்பியூர் அருகே உள்ள எலத்தூரில் மாற்றுக் கட்சியினர் அதிமுகவில் இணையும் விழா நடந்தது. பள்ளிக்கல்வித்துறை அமைச்சர் கே.ஏ. செங்கோட்டையன் முன்னிலையில் மாற்றுக்கட்சியிலிருந்து வெளிவந்த நிர்வாகிகள் மற்றும் தொண்டர்கள் 200-க்கும் மேற்பட்டவர்கள் அதிமுகவில் இணைந்தனர்.
அவர்களுக்கு அமைச்சர் பொன்னாடை போர்த்தியும் டி-சட்டைகள் வழங்கியும் கவுரவித்தார். அப்போது அமைச்சர் செங்கோட்டையன் நிருபர்களிடம் கூறியதாவது:-
தமிழகத்தில் நல்லமழை பெய்து ஏரி குளங்கள் அணை நிரம்பியுள்ளதே தமிழகத்தில் நல்லாட்சி நடைபெறுகிறது என்பதற்கு எடுத்துக்காட்டு. மாணவர்களுக்கு மடிக்கணினி மிதிவண்டி வழங்கும் சிறப்பான பல அரசின் திட்டங்களை மற்ற மாநிலங்கள் பின்பற்றி வருகிறது.
தமிழகத்தில் தூய்மையான ஆட்சி நடைபெறுகிறது. மத்திய அரசின் ஐசிடி நிதியுதவியுடன் ஸ்மார்ட் வகுப்பறைகள் அமைக்கவும் கணினிகள் அமைக்கவும் நேற்றைய முன்தினம் இந்தியாவிலேயே முதல் முறையாக தமிழகத்தில் டெண்டர்கள் முடிவடைந்து பணிகள் தொடங்க ஆணை பிறப்பிக்கப்பட்டுள்ளது. இப்பணிகள் நிறைவடையும் போது இந்தியாவே திரும்பிப் பார்கின்ற ஒரு மாற்றத்தை தமிழகம் உருவாக்கும்.
இந்த டெண்டர்கள் மூலம் தனியார் நிறுவனங்கள் ஸ்மார்ட் வகுப்பறைகள் கணினிகள் அமைந்து நான்கு ஆண்டுகள் பராமரிக்கும் வகையில் திட்டம் செயல்படுத்தப்பட்டுள்ளது. சிறப்பாசிரியர்கள் கலந்தாய்வு விரைவில் நடைபெறும். அது முடிந்தவுடன் சிறப்பாசிரியர் பணியிடங்கள் அனைத்தும் நிரப்பப்படும்.
நீட் தேர்வு உள்ளிட்ட மத்திய அரசு கொண்டு வரும் அனைத்து பொதுத் தேர்வுகளையும் மாணவர்கள் சந்திக்கும் வகையில் 40 சதவிகித பாடங்கள் மாற்றியமைக்கப்பட்டுள்ளது.
வருகிற இடைத்தேர்தலுக்காக கட்சியின் சார்பில் அமைக்கப்பட்டு வரும் பூத் கமிட்டியில் ஏராளமான இளைஞர்கள் இணைக்கப்பட்டுள்ளனர். அதிமுகவின் பூத் கமிட்டிபோல் மத்தியில் உள்ள தேசிய கட்சிகளில் கூட இல்லாத அளவிற்கு பூத் கமிட்டி அமைக்கப்பட்டு வருகிறது. வரும் இடைத்தேர்தலில் அ.தி.மு.க. மகத்தான வெற்றி பெறும்.
இவ்வாறு அவர் கூறினார். #ADMK #TNMinister #Sengottaiyan
