சேலம், நாமக்கல்லில் கமல்ஹாசன் 3 நாட்கள் பொதுமக்களை சந்திக்கிறார்

சென்னை:

மக்கள் நீதி மய்யம் கட்சி தலைவர் கமல்ஹாசன் ஒவ்வொரு மாவட்டமாக சுற்றுப்பயணம் செய்து பொதுமக்களை சந்தித்து வருகிறார். அவர்களுடன் கலந்துரையாடி குறைகளை கேட்கிறார்.

ஏற்கனவே ஈரோடு, கன்னியாகுமரி, கோவை, திருப்பூர் உள்ளிட்ட மாவட்டங்களில் சுற்றுப்பயணம் செய்தார். அப்போது மாணவ-மாணவிகளுடனும் கலந்துரையாடினார்.

இந்த நிலையில் கமல்ஹாசன் வருகிற 12-ந்தேதி முதல் 3 நாட்கள் சேலம், நாமக்கல்லில் சுற்றுப்பயணம் செய்கிறார்.

12-ந்தேதி சேலம் மாவட்டம் மகுடஞ்சாவடி, மல்ல சமுத்திரம், இளம்பிள்ளை ஆகிய இடங்களிலும், 13-ந்தேதி ஓமலூர், மேட்டூர், கங்கவள்ளி, ஆத்தூர், அயோத்தியாபட்டிணம், பள்ளப்பட்டி, கோட்டை பாளையம் ஆகிய இடங்களிலும் சுற்றுப்பயணம் செய்கிறார்.

14-ந்தேதி நாமக்கல், மல்லூர், ராசிபுரம், புதுசத்திரம், திருச்சேங்கோடு, பள்ளிப்பாளையம், குமாரபாளையம் ஆகிய இடங்களில் சென்று பொதுமக்களை சந்திக்கிறார். #KamalHaasan #MakkalNeethiMaiyam