புதுச்சேரி:
புதுவை பள்ளி கல்விதுறை இணை இயக்குனர் குப்புசாமி வெளியிட்டுள்ள செய்திக்குறிப்பில் கூறியிருப்பதாவது:-
செப்டம்பர், அக்டோபர் மாதங்களில் நடைபெற உள்ள பிளஸ்-2 துணைதேர்வு எழுத அரசு தேர்வு துறையால் அறிவிக்கப்பட்ட நாட்களில் விண்ணப்பித்த அனைத்து தனித்தேர்வர்களும் நாளை மறுநாள் (திங்கட்கிழமை) பிற்பகல் 2 மணி முதல் இணையதளத்தின் மூலம் தேர்வுக்கு நுழைவு சீட்டுகளை பதிவிறக்கம் செய்து கொள்ளலாம்.
இணையதளத்தில் நுழைவு சீட்டு என்பதனை கிளிக் செய்து தங்களது விண்ணப்ப எண் மற்றும் பிறந்த தேதியினை பதிவு செய்தால் அவர்களுடைய தேர்வு கூட அனுமதிசீட்டு திரையில் தோன்றும். அதனை பதிவிறக்கம் செய்து கொள்ளலாம்.
எழுத்து தேர்வு மற்றும் செய்முறை அடங்கிய பாடங்களில் செய்முறைத்தேர்வில் 40 மதிப்பெண்களுக்கு குறைவாக பெற்று தேர்ச்சி அடையாதவர்கள் கண்டிப்பாக செய்முறை தேர்வினை மீண்டும் செய்வதோடு எழுத்து தேர்விற்கும் வருகை புரிய வேண்டும். அதிகபட்ச மதிப்பெண் 200 கொண்ட செய்முறை மட்டும் உள்ள பாடத்தில் தேர்ச்சி பெறாதவர்கள் மீண்டும் செய்முறை தேர்விற்கு வருகைதர வேண்டும்.
இதேபோல் செப்டம்பர், அக்டோபர் மாதங்களில் நடைபெற உள்ள 10-ம்வகுப்பு துணைத்தேர்வு எழுத அரசுதேர்வு துறையால் அறிவிக்கப்பட்ட நாட்களில் விண்ணப்பித்த அனைத்து தனித்தேர்வர்களும் இன்று (சனிக்கிழமை) பிற்பகல் முதல் இணையதளத்தின் மூலம் தேர்வுகூட அனுமதி சீட்டுகளை பதிவிறக்கம் செய்து கொள்ளலாம். உரிய தேர்வு கூட அனுமதி சீட்டின்றி எந்த ஒரு தேர்வரும் தேர்வெழுத அனுமதிக்கப்பட மாட்டார்கள்.
இவ்வாறு அந்த செய்தி குறிப்பில் கூறப்பட்டுள்ளது.
