வாணாபுரம்:
வாணாபுரம் அருகே உள்ள குயிலம் பகுதியில் 2 ஆயிரத்திற்கும் மேற்பட்ட பொதுமக்கள் வசித்து வருகின்றனர். இவர்களுக்கு ஊராட்சி நிர்வாகம் கிணறு மற்றும் ஆழ்துளை கிணறு மூலம் மேல்நிலை நீர்த்தேக்க தொட்டிக்கு நீர் ஏற்றப்பட்டு பிறகு பொது மக்களுக்கு குடிநீர் வினியோகிக்கப்படுகிறது.
இந்த நிலையில் ஆழ்துளை கிணற்றின் மின் மோட்டார் பழுதானதால் குடிநீர் தட்டுப்பாடு நிலவி வருகின்றது. இதனால் அப்பகுதி பொதுமக்கள் குடிநீருக்காக பல்வேறு இடங்களுக்கு சென்று குடங்களில் குடிநீர் எடுத்து வருகின்றனர். மேலும் விவசாய நிலங்களுக்கு சென்றும் தண்ணீர் எடுத்து வந்து பயன்படுத்துகின்றனர். இதனால் பள்ளி கல்லூரி செல்லும் மாணவ - மாணவிகள் கடும் சிரமப்பட்டு வருகின்றனர்.
இதுகுறித்து சம்பந்தப்பட்ட ஊராட்சி நிர்வாகத்திடம் சீரான குடிநீர் வினியோகிக்க வேண்டும் என்று அப்பகுதி பொதுமக்கள் பலமுறை புகார் தெரிவித்தும் எந்தவிதமான நடவடிக்கையும் எடுக்கப்படவில்லை என்று கூறப்படுகிறது.
எனவே, ஆழ்துளை கிணற்றின் மின் மோட்டாரை சீரமைத்து சீரான குடிநீர் வினியோகிக்க வேண்டும் என்று பொதுமக்கள் கோரிக்கை விடுத்துள்ளனர்.
