கமுதி:
ராமநாதபுரம் மாவட்டம் கமுதி அருகே உள்ள அபிராமம் போலீஸ் சரகத்திற்குட்பட்ட பொதுக்குடி கிராமத்தைச் சேர்ந்தவர் செந்தில். இவரது மனைவி ஜெயக்கொடி (வயது 28). இவர்களுக்கு 2 குழந்தைகள் உள்ளனர். இன்று காலை தனது மனைவி மற்றும் குழந்தைகளுடன் செந்தில் மோட்டார் சைக்கிளில் வெளியே புறப்பட்டார்.
அப்போது 2 மோட்டார் சைக்கிள்களில் 5 மர்ம நபர்கள் இவர்களை பின் தொடர்ந்தனர். விரதக் குளம் அருகே ஆள் நடமாட்டம் இல்லாத பகுதியில் வந்தபோது திடீரென மர்ம நபர்கள் தங்கள் மோட்டார் சைக்கிளால், செந்தில் வந்த மோட்டார் சைக்கிள் மீது மோதினர்.
இதில் நிலை தடுமாறிய செந்தில், ஜெயக்கொடி மற்றும் 2 குழந்தைகள் கீழே விழுந்தனர். உடனே அந்த கும்பல் 2 குழந்தைகளையும் பிடித்துக் கொண்டனர்.
ஜெயக்கொடியிடம் ‘நீ அணிந்திருக்கும் நகையை கொடு, இல்லையென்றால் குழந்தைகளை கத்தியால் குத்திக்கொலை செய்து விடுவோம்’ என மிரட்டினர்.
அதிர்ச்சியடைந்த ஜெயக்கொடி கழுத்தில் கிடந்த 11 பவுன் தங்கச்சங்கிலியை கொள்ளையர்களிடம் கழற்றிக் கொடுத்தார். அப்போது செந்தில் தடுக்க வந்தார்.
இதனால் ஆத்திரம் அடைந்த அந்த கும்பல் செந்திலை அரிவாளால் வெட்டிவிட்டு அங்கிருந்து தப்பியது. இது குறித்து அபிராமம் போலீசில் புகார் செய்யப்பட்டது. இன்ஸ்பெக்டர் சேது விசாரணை நடத்தி வருகிறார்.
பட்டப்பகலில் நடந்த இந்த துணிகர சம்பவம் கமுதி மக்களிடையே பெரும் அதிர்ச்சியை ஏற்படுத்தி உள்ளது.
