முதுகுவலியும், கழுத்து வலியும் தற்போது பள்ளிக்கு செல்லும் பிள்ளைகளிடம் அதிகரித்து வருகின்றன. காரணம் பள்ளிக்கு செல்லும் குழந்தைகளுக்கு சரியான பாஸ்ச்சர் எது என்பதை யாரும் கற்றுத் தருவதில்லை. குழந்தைகளின் முதுகெலும்பானது மிகவும் மென்மையானது. அது அந்த வயதில் முழுமையாக வளர்ச்சியடைந்திருப்பதில்லை. 14 முதல் 16 சதவிகிதம் பள்ளிக் குழந்தைகளுக்கு முதுகு வலி இருப்பதாகச் சொல்கிறார்கள் என்கிறது ஒரு புள்ளி விவரம்.
பள்ளிக்கூடத்தில்
* நீண்ட நேரம் ஒரே இடத்தில் உட்கார்ந்திருப்பது.
* தவறான முறையில் வடிவமைக்கப்பட்ட பெஞ்சுகள் மற்றும் இருக்கைகள். அவை பிள்ளைகளின் உயரத்துக்கேற்றபடி சரிசெய்துகொள்ள ஏதுவாக
இல்லாமலிருப்பது.
* பொதி சுமப்பது போன்ற அதிக கனமான புத்தகப்பைகள்.
இந்த எல்லாம் சேர்ந்து குழந்தைகளின் முதுகுப் பகுதிக்கு அதிக அழுத்தம் சேர்க்கின்றன. அதனால் வளர்ச்சி நிலையில் உள்ள முதுகெலும்பானது வளைகிறது. உயரத்தைக் குறைத்து உருவத்தையே மாற்றுகிறது. முகுதுவலியை அதிகப்படுத்துகிறது.
தீர்வுகள் என்ன? * குழந்தைகளின் பள்ளி டைம் டேபிளை மாற்றி அமைக்க வேண்டும். பாடங்களை குறைத்து, டைம் டேபிள் நேரத்தை அதற்கேற்ப குறைத்து
குழந்தைகளின் சுமை யை அகற்றலாம்.
* இன்டர்வெல் என்கிற பெயரில் 10 நிமிடங்களையும், மதிய உணவுக்கு அரை மணி நேரத்தையும் ஒதுக்குவது போக, அவற்றைத் தாண்டியும் நடுவில்
சின்னச் சின்ன பிரேக் கொடுத்து குழந்தைகளை எழுந்து நடமாட செய்யலாம்.
* இன்று பல பள்ளிக்கூடங்களிலும் பிளே கிரவுண்ட் கிடையாது. அப்படியே இருந்தாலும் விளையாட்டுக்கான பீரியடையும் பாட ஆசிரியர்கள் பறித்துக் கொள்கிறார்கள். இது முற்றிலும் தவறு. பள்ளிக்கூடங்களில் மைதானங்களில் வெயில் மேலே படும்படி பிள்ளைகளை விளையாட அனுமதிக்க வேண்டும்.
* பெரும்பாலான பள்ளிகளிலும் குழந்தைகளுக்கான மேஜைகளும், நாற்காலிகளும் சரியாக வடிவமைக்கப் பட்டவையாக இருப்பதில்லை. குழந்தைகளின் உயரத்துக்கும், கைகளையும், கால்களையும் வைத்துக்கொள்ள ஏற்றபடியும், முதுகுப் பகுதி இருக்கையின் பின்னால் பதியும் படியும் இருக்கும்படியான மேஜைகளும், நாற்காலிகளும் அவசியம்.
வீட்டில் என்ன செய்யவேண்டும்? * படிக்கிற குழந்தைகள் அடிக்கடி எழுந்து நடக்கவும், நிற்கவும் அறிவுறுத்துங்கள். ஒரே இடத்தில் பல மணி நேரம் உட்கார்ந்தபடி படிப்பதை
ஊக்குவிக்காதீர்கள்.
* அவர்களுக்கான ஸ்டடி டேபிள் மற்றும் கம்ப்யூட்டர் டேபிள்களை அவர்களது உயரத்துக்கேற்றபடி அமைத்துக்கொடுங்கள்.
* தினமும் ஒன்று முதல் 2 மணி நேரம் தொடர்ந்து டிவி பார்க்கும் குழந்தைகளில் 60 சதவீதம் பேருக்கு சீக்கிரமே முதுகு வலி வருவதாக சொல்கிறது ஒரு சமீபத்திய ஆய்வு.
* கொழுகொழு குழந்தைதான் ஆரோக்கியமானது என நினைக்காதீர்கள். குழந்தைகளின் எடையில் எப்போதும் பெற்றோருக்கு ஒரு கண் இருக்க வேண்டும். சராசரியைவிட அதிக எடையுடன் காணப்படுகிற குழந்தைகளைக் கவனித்து எடை அதிகரிப்புக்கான காரணத்தைக் கண்டறியவும், அதைக் குறைக்கவும் முயற்சிகள் எடுக்க வேண்டும். அதிகப்படியான உடல் எடை என்பது முதுகின் ஆரோக்கியத்துக்கு நல்லதல்ல.
