புதுடெல்லி:
ரெனால்ட் இந்தியா விற்பனையாளர்கள் சமீபத்தில் அறிமுகம் செய்த கேப்டூர் எஸ்யுவி மாடலின் விலையில் இருந்து ரூ.1.25 லட்சம் வரை தள்ளுபடி வழங்கி வருகின்றன.
2017-ம் ஆண்டு தயாரிக்கப்பட்ட கேப்டூர் மாடல்களுக்கு மட்டுமே இந்த தள்ளுபடி வழங்கப்படுகிறது. ஸ்டாக் இருக்கும் வரை தள்ளுபடி வழங்கப்படுகிறது. முந்தைய ஆண்டு மாடல்களின் விற்பனையை அதிகரிக்க இவ்வாறான சலுகைகளை வழங்குகின்றன. பயனர் மத்தியில் இந்த கார்களை வாங்குவது அதிகப்படியான பணத்தை சேமிக்க வழி செய்யும்.
ரெனால்ட் கேப்டூர் எஸ்யுவி M10 தளத்தை சார்ந்து உருவாக்கப்பட்டுள்ளது. 4329 மில்லிமீட்டர் நீளமாகவும், 1813 மில்லிமீட்டர் அகலமாகவும், 1613 மில்லிமீட்டர் உயரமாக இருக்கிறது. இதன் வீல்பேஸ் 2673 மில்லிமீட்டர் மற்றும் கிரவுண்ட் கிளியரன்ஸ் 210 மில்லிமீட்டராக உள்ளது.
இதன் பக்கவாட்டுகளில் உறுதியான வெய்ஸ்ட்லைன் மற்றும் உயர்த்தப்பட்ட ஸ்டான்ஸ் வழங்கப்பட்டுள்ளது. இதன் பின்புறம் எல்இடி டெயில் லேம்ப் மற்றும் சேடின் ஃபினிஷ் செய்யப்பட்ட ஸ்கிட் பிளேட் மற்றும் கிலீன் டெயில்கேட் வடிவமைப்பு வழங்கப்பட்டுள்ளது.
கேப்டூர் இன்டீரியர் அம்சங்களை பொருத்த வரை டச் ஸ்கிரீன் இன்ஃபோடெயின்மென்ட் சிஸ்டம் மற்றும் ஆட்டோமேடிக் கிளைமேட் கண்ட்ரோல் வழங்கப்பட்டுள்ளது. ரெனால்ட் கேப்டூர் கிராஸ்ஓவர் மாடலில் 1.5 லிட்டர் K9 டீசல் இன்ஜின் கொண்டுள்ளது. இந்த இன்ஜின் 110bhp செயல்திறன் கொண்டுள்ளது. இதே இன்ஜின் ரெனால்ட் டஸ்டர், நிசான் டெரானோ போன்ற மாடல்களிலும் வழங்கப்பட்டது குறிப்பிடத்தக்கது.
எல்இடி ஹெட்லேம்ப், டேடைம் ரன்னிங் லேம்ப், ஆடி மாடல்களை போன்ற டைனமிக் டர்ன் இன்டிகேட்டர், கீலெஸ் என்ட்ரி அம்சங்களை வழங்க ஸ்மார்ட் அக்சஸ் கார்டு, 17.0 இன்ச் அலாய் வீல், 7.0 இன்ச் டச் ஸ்கிரீன் மல்டிமீடியா ஸ்கிரீன், ப்ளூடூத், யுஎஸ்பி, மேப்ஸ் மற்றும் நேவிகேஷன் போன்ற கனெக்டிவிட்டி ஆப்ஷன்கள் வழங்கப்பட்டுள்ளது.
இத்துடன் பாதுகாப்பு அம்சங்களை பொருத்த வரை ABS, EBD பிரேக் அசிஸ்ட், ஹில் ஸ்டார்ட் அசிஸ்ட் உள்ளிட்டவை வழங்கப்பட்டுள்ளது.
