கலர்புல் மலேசியாவில் காண வேண்டிய அழகிய மாநிலம் பேராக்: புகைப்பட தொகுப்பு

கோலாலம்பூர்:

மலேசிய தலைநகர் கோலாலம்பூரில் இருந்து 200 கி.மீ. வடக்கே அமைந்துள்ள பேராக் மாநிலத்தை ஒரு அமைதிப் பூங்கா என்று தான் சொல்ல வேண்டும். சுற்றுலாவுக்காக  கோலாலம்பூர் செல்பவர்கள், நெரிசல் இல்லாமல் ஒரு அழகான நகரத்தை பார்க்க விரும்பினால் பேராக் மாநிலம் அவர்களுக்கு அற்புத அனுபவத்தை தரும் என்பதில் சந்தேகமில்லை. 

பேராக் மாநிலத்தின் தலைநகர் ஈபோ. ஆங்கிலேயர் காலத்து ஆட்சியாளர்கள், ஈபோவை மலேசியாவின் இரண்டாவது தலைநகராக பயன்படுத்தி வந்தார்கள். ஈபோவில் வரலாற்று சிறப்புமிக்க கட்டிடங்கள் பல உள்ளன. மேலும் இங்கு மெத் என்ற அனிமேஷன் தீம் பார்க் ஒன்றும் உள்ளது. இங்கு குழந்தைகளை கவரக்கூடிய பலவிதமான விளையாட்டுக்கள் இருப்பது சிறப்பு. இது ஆசியாவின் முதல் அனிமேஷன் தீம் பார்க் என்பது குறிப்பிடத்தக்கது. 

தைப்பிங்

பேராக் மாநிலத்தில், ஈபோவிற்கு அடுத்து பெரிய நகரம் தைப்பிங். அதிக மழைபொழியக்கூடிய இடமான இங்கு, கண்ணைக் கவரும் இயற்கைக் காட்சிகளும், பூங்காக்களும், குளங்கள் உள்ளிட்ட நீர் தேக்கங்களும் சூழ்ந்து ரம்மியமாக கண்ணுக்கு குளிர்ச்சியை தரும்படி இருக்கிறது. 

பேராக்கில் பிரசித்தி பெற்ற மற்றொரு நகரம் இது. இயற்கை எழில் கொஞ்சும் புல்வெளியுடன் கூடிய கார்டன்தான் தைப்பிங்கில் அமைந்திருக்கும் ஏரிப்புல்வெளி. இங்கு அடிக்கடி மழை பெய்வது ஆச்சரியமான விஷயம்! பினாங் விமானதளத்தில் இருந்து 90 நிமிட பயண நேரத்தில் அமைந்திருக்கிறது தைப்பிங் கார்டன். 

ஏரியை ஒட்டி அமைந்திருக்கும் அழகான புல்வெளி நம் மனதை மயக்கும். அருகிலேயே நூறு ஆண்டுகள் பழமையான தைப்பிங் வனவிலங்குகள் சரணாலயம் அமைந்திருக்கிறது. இந்த உயிரியல் பூங்காவில் நைட் சஃபாரி (இரவில் விசிட் செய்து மிருகங்களைப் பார்ப்பது) ஒரு திரில்லிங்கான அனுபவம். 

சிங்கம், புலி, ஒட்டகம், காண்டா மிருகம், நீர் யானை, ஒட்டகச்சிவிங்கி, யானைகள் உட்பட பல அரிய வனவிலங்குகளை நள்ளிரவில் பார்த்து ரசிக்கும் த்ரில் ரசிகர்களுக்கு மிகவும் பிடிக்கும். அங்கு பார்வையாளர்களின் அருகிலேயே மிருகங்கள் வருகின்றன. மிருகங்கள் வந்தாலும் அதற்குரிய பாதுகாப்பும் செய்யப்பட்டுள்ளது.

கெல்லீஸ் கேஸ்ட்ல்

தாஜ்மஹாலை போல பேராக்கில் அமைந்துள்ள காதல் சின்னம் தான் கெல்லீஸ் கேஸ்ட்ல். பத்துகாஜா என்ற இடத்தில் நமது தமிழ் நாட்டு கட்டடக் கலையை பறைசாற்றும் ஒரு நினைவு சின்னம் என்றே இதைச் சொல்லலாம். வில்லியம் கெல்லி ஸ்மித் என்ற கட்டடக்கலை பொறியாளர் ஸ்காட்லாந்து நாட்டை சேர்ந்தவர். அவர் 1890-ம் ஆண்டில் தனது 20-வது வயதில் மலேசியா வந்து மலேசிய அரசாங்கத்தில் பணிபுரிந்தவர். 

தமிழகத்து கட்டடக்கலையில் ஆர்வம் கொண்ட கெல்லீஸ் தமிழ்நாட்டு அரண்மனை போலவே ஒரு அரண்மனையை அமைக்க முயற்சி செய்தார். இங்கிருந்து 70 கட்டடக்கலை ஆட்களையும் கற்களையும் மண்ணையும் கொண்டு சென்று தமிழ்நாட்டு அரண்மனை போலவே வடிவமைக்கத் தொடங்கினார். இந்த அரண்மனையை தனது மனைவிக்கு பரிசளிக்க திட்டமிட்டிருந்தார். ஆனால் விதியின் விளைவால் பாதி அரண்மனை கட்டிக்கொண்டிருக்கும்போதே அவர் மறைந்துபோக அந்த அரண்மனை பாதியில் நிற்கிறது. அரண்மனையிலிருந்து பார்க்கும் தொலைவில் ஒரு தமிழ் கோவில் அமைக்கப்பட்டிருப்பது சிறப்பு.

மேப்ஸ் 

மூவி அனிமேஷன் பார்க் ஸ்டூடியோஸ் பேராக் மாநிலத்தில் உள்ள ஈப்போ பகுதியின் முக்கிய பொழுதுபோக்கு விஷயங்களில் ஒன்று. இங்கே உலகிலேயே வேறு எங்கும் காண முடியாத ஸ்பேஸ் ஷிப் ஹோட்டல் இருக்கிறது. பறப்பது போன்ற அனுபவத்துடன் சாப்பிடுவது அலாதியான அற்புத அனுபவம். அதோடு மொத்தம் 15 த்ரில்லிங் ரைடுகளுடன் 23 விதமான விளையாட்டுக்களையும் உள்ளடக்கியது மேப்ஸ். 6 தீம் பகுதிகளும் நம்மை குழந்தைப்பருவத்துக்கே கூட்டி செல்லும். குழந்தைகளை குதூகலிக்க வைக்கும் ஒரு சொர்க்கமாக இந்த தீம் பார்க் திகழ்கிறது. இதுவரையில் இங்கு யாரும் சினிமா படப்பிடிப்பு நடத்தியது இல்லை. சினிமாவில் வரும் பாடல் காட்சிகளை எடுப்பதற்கு ஏற்ற இடம் இது. 

சுல்தான் அஷ்லான் ஷா கேலரி 

பேராக் மாநிலத்தின் மிக முக்கிய சுற்றுலாத் தலம் இது. சுல்தான் ஷா ஒருவரின் அரண்மனையை அப்படியே பாதுகாத்து வைத்திருக்கிறார்கள். 1898-ல் பேராக்கை ஆண்ட சுல்தானின் நினைவு இல்லம்தான் இது. சுல்தான் ஷா பயன்படுத்திய தங்கம் மற்றும் வெள்ளியிலான அழகு மிகுந்த பொருட்களை பார்க்கும்போது, நம்மை ஆச்சரியத்தில் மூழ்கடித்து விடும். முழுக்க முழுக்க இயற்கை பொருட்களை வைத்து எழில் கொஞ்சும் அளவுக்கு இந்த அரண்மனை கட்டப்பட்டிருக்கிறது.