திருச்சி:
தி.மு.க. செயல் தலைவர் மு.க.ஸ்டாலின் இன்று காலை விமானம் மூலம் சென்னையில் இருந்து திருச்சி வந்தார். திருச்சி சங்கம் ஹோட்டலில் தங்கியிருந்தார்.
அவருடன் முன்னாள் அமைச்சர்கள் கே.என்.நேரு, ஏ.வ.வேலு எம்.எல்.ஏக்கள் மகேஷ் பொய்யா மொழி, ஸ்டாலின் குமார், முன்னாள் எம்.எல்.ஏக்கள் அன்பில் பெரியசாமி, கே.என்.சேகரன் மாநகர செயலாளர் அன்பழகன் மற்றும் தி.மு.க.வினர் சந்தித்து பேசினர்.
திருச்சியில் இரண்டு துக்க நிகழ்ச்சிகள் தொடர்பாக அவர்களது உறவினர்களிடம் விசாரித்த மு.க.ஸ்டாலின் அவர்களுக்கு ஆறுதல் கூறினார். தொடர்ந்து மீண்டும் சங்கம் ஹோட்டல் சென்ற அவர் சிறிது நேரம் ஓய்வு எடுத்தார்.
வருகிற டிசம்பர் 31-ந் தேதிக்குள் ஆர்.கே.நகர் இடைத்தேர்தல் நடைபெறுவது தொடர்பான அறிவிப்பு குறித்தும், அது தொடர்பான விசயங்கள் குறித்தும் முக்கிய நிர்வாகிகளிடம் கருத்து கேட்டு ஆலோசனை நடத்தினார்.
மேலும் டெங்கு கொசு ஒழிப்பு, காய்ச்சல் தடுப்பு, விழிப்புணர்வு பணிகளில் பொதுமக்களுக்கு உதவியாக தி.மு.க.வினர் தொடர்ந்து தீவிரமாக எவ்வாறு செயல்படுவது என்பது குறித்தும் மு.க.ஸ்டாலின் ஆலோசனை வழங்கினார். தி.மு.க. தலைவர் கருணாநிதி முன்பை விட உடல் நலம் தேறி வரும் தகவலையும் தெரிவித்தார்.
அதன் பிறகு மு.க.ஸ்டாலின் விமானம் மூலம் மீண்டும் சென்னை புறப்பட்டு சென்றார்.
