கோவில்பட்டி:
கோவில்பட்டி பண்ணை தோட்ட தெருவை சேர்ந்தவர் பரமசிவன் (வயது35). இவர் திருப்பூரில் வேலை பார்த்து வருகிறார். இவரது மனைவி பரமேஸ்வரி (33). இவர்களது மகன் மூர்த்தி (9). இவன் கடந்த சில மாதங்களுக்கு முன்பு உடல் நலக்குறைவு காரணமாக இறந்து விட்டான்.
மகன் இறந்த துக்கம் தாங்காமல் பரமேஸ்வரி மனமுடைந்த நிலையில் இருந்து வந்தார். அவருக்கு பரமசிவன் ஆறுதல் கூறி வந்தார். இந்நிலையில் நேற்று மாலை பரமசிவன் மனைவிக்கு போன் செய்து நான் நாளை (இன்று) ஊருக்கு வருகிறேன் என கூறினார். அதன்படி இன்று காலை திருப்பூரில் இருந்து பரமசிவன் தனது வீட்டிற்கு வந்தார்.
அப்போது அவர் கதவை திறந்து பார்த்த போது அங்கு பரமேஸ்வரி மர்மமான முறையில் இறந்து கிடந்தார். இதுகுறித்து கோவில் பட்டி கிழக்கு போலீசில் புகார் செய்யப்பட்டது. போலீசார் விரைந்து வந்து பரமேஸ்வரியின் உடலை மீட்டு பிரேத பரிசோதனைக்காக அரசு ஆஸ்பத்திரிக்கு அனுப்பி வைத்தனர்.
மேலும் போலீசார் இச்சம்பவம் குறித்து வழக்குப் பதிவு செய்து மகன் இறந்த துக்கத்தில் பரமேஸ்வரி தற்கொலை செய்து கொண்டாரா? அல்லது வேறு ஏதேனும் காரணமா? என பல கோணங்களில் போலீசார் விசாரணை நடத்தி வருகின்றனர்.
