சென்னை:
3-வது பிரிமியர் பேட்மிண்டன் லீக் (பி.பி.எல்.) போட்டிகள் கடந்த 23-ம் தேதி தொடங்கியது. இப்போட்டிகள் ஜனவரி 14-ந் தேதி வரை சென்னை, கவுகாத்தி, டெல்லி, லக்னோ, ஐதராபாத் ஆகிய நகரங்களில் நடக்கிறது. இதில் சென்னை ஸ்மாஷர்ஸ், அகமதாபாத் ஸ்மாஷ் மாஸ்டர்ஸ், லக்னோ அவாதே வாரியர்ஸ், பெங்களூரு பிளாஸ்டர்ஸ், டெல்லி டாஷர்ஸ், ஐதராபாத் ஹன்டர்ஸ், மும்பை ராக்கெட்ஸ், நார்த் ஈஸ்டர்ன் வாரியர்ஸ் ஆகிய 8 அணிகள் பங்கேற்கின்றன.
நான்காவது சுற்று ஆட்டங்கள் சென்னை நகரில் நேற்று முன்தினம் தொடங்கியது. நேற்று நடைபெற்ற லீக் ஆட்டத்தில் சென்னை ஸ்மாஷர்சும், அகமதாபாத் ஸ்மாஷ் மாஸ்டர்சும் மோதின.
முதல் ஆண்கள் ஒற்றையர் பிரிவு ஆட்டத்தில் சென்னையின் தனோங்சக் சீன்சோம்பூன்சக், அகமதாபாத் அணியின் பிரனோய் ஆகியோர் மோதினர். இப்போட்டியை அகமதாபாத் அணி துருப்பு ஆட்டமாக தேர்ந்தெடுத்து விளையாடியது. இதில் தனோங்சக் சீன்சோம்பூன்சக், 15-10, 12-15, 15-14 என்ற நேர் செட்களில் வெற்றி பெற்றார்.
இரண்டாவது ஆண்கள் ஒற்றையர் பிரிவு ஆட்டத்தில் அகமதாபாத்தின் சவுரப் வெர்மா, சென்னையின் பிரைஸ் லெவர்டெஸ் ஆகியோர் மோதினர். இந்த ஆட்டத்தை சென்னை அணி துருப்பு ஆட்டமாக தேர்ந்தெடுத்தது. இதில் சவுரப் வெர்மா, 12-15, 15-14, 15-12 என்ற நேர் செட்களில் வெற்றி பெற்றார்.
பெண்கள் ஒற்றையர் பிரிவு ஆட்டத்தில் சென்னை அணியின் பி.வி.சிந்து, அகமதாபாத் அணியின் தியா சூ-யிங்கை எதிர்த்து விளையாடினார். இதில் 15-11, 10-15, 15-12 என்ற செட்களில் சிந்து வென்றார்.
ஆண்கள் இரட்டையர் பிரிவு போட்டியில் சென்னையின் கிறிஸ் அட்காக் - லீ யங் ஜோடி, அகமதாபாத்தின் நந்தகோபால் - லீ ரெஜினால்ட் ஜோடியை எதிர்கொண்டது. இப்போட்டியில், 15-13, 15-12 என்ற நேர் செட்களில் அகமதாபாத் அணி வெற்றி பெற்றது.
கலப்பு இரட்டையர் பிரிவு போட்டியில் சென்னையின் சுமீத் ரெட்டி - பி.வி.சிந்து ஜோடி, அகமாபாத் அணியின் லீ ரெஜினால்ட் - கமில்லா ரைதெர் ஜூல் ஜோடியை எதிர்கொண்டது. இப்போட்டியில் 15-14, 15-13 என்ற நேர் செட்களில் சென்னை அணி வெற்றி பெற்றது.
நேற்றைய போட்டிகளின் முடிவில் 2-1 என்ற புள்ளிக்கணக்கில் சென்னை ஸ்மாஷர்ஸ் அணி வெற்றி பெற்றது. இன்று நடைபெறும் போட்டிகளில் லக்னோ அவாதே வாரியர்ஸ் - ஐதராபாத் ஹன்டர்ஸ் அணிகள் விளையாட உள்ளன. #VodafonePBL #ChennaiSmashers #AhmedabadSmashMasters
