வெஸ்ட் இண்டீஸ் அணியின் தலைசிறந்த ஆல்-ரவுண்டராக திகழ்ந்தவர் வெயின் பிராவோ. டெஸ்ட் போட்டியில் விளையாடாமல் ஒருநாள் மற்றும் டி20 கிரிக்கெட் தொடரில் மட்டுமே பங்கேற்று வந்தார். மேலும், பல்வேறு கிரிக்கெட் வாரியத்தால் நடத்தப்படும் டி20 லீக் தொடரில் முக்கிய வீரராக பங்கேற்று வந்தார். கடந்த ஆண்டு டிசம்பர் மாதம் நடைபெற்ற பிக்பாஷ் தொடரின்போது தொடைப்பகுதியில் ஏற்பட்ட காயம் காரணமாக நீண்ட காலமாக கிரிக்கெட் விளையாடாமல் இருந்து வந்தார்.
தற்போது காயத்தில் இருந்து மீண்டுள்ள வெயின் பிராவோ வெஸ்ட் இண்டீஸ் அணிக்காக விளையாட விரும்பினார். விரைவில் தொடங்கும் நியூசிலாந்துக்கு எதிரான ஒருநாள் தொடரில் விளையாட விரும்பினார். அணியில் இடம் கிடைக்கும் என அதிக நம்பிக்கையில் இருந்தார். ஆனால் அணியில் இடம் கிடைக்கவில்லை. இந்நிலையில் இனிமேல் வெஸ்ட் இண்டீஸ் அணிக்கு திரும்புவது சந்தேகம் என பிராவோ கூறியுள்ளார்.
இதுகுறித்து வெஸ்ட் இண்டீஸ் கிரிக்கெட் அணியின் ஆல்-ரவுண்டரான 34 வயது வெயின் பிராவோ கூறுகையில் ‘‘சர்வதேச கிரிக்கெட் போட்டியில் வெஸ்ட் இண்டீஸ் அணியில் இருந்து நான் நீக்கப்பட்டு இருக்கிறேன். நல்ல உடல் தகுதியுடன் இருந்த போதும் என்னை சேர்க்கவில்லை.
எனவே மீண்டும் வெஸ்ட்இண்டீஸ் அணிக்கு திரும்ப முடியும் என்று நினைக்கவில்லை. என்னால் எத்தனை ஆண்டு காலம் கிரிக்கெட் விளையாட முடியுமோ? அத்தனை காலம் வரை தொடர்ந்து மற்ற போட்டிகளில் விளையாடுவேன்’’ என்றார்.
கடந்த ஆண்டு செப்டம்பர் மாதம் நடந்த பாகிஸ்தானுக்கு எதிரான 20 ஓவர் போட்டி தொடரில் வெயின் பிராவோ வெஸ்ட்இண்டீஸ் அணியில் இடம் பிடித்தார். அதன் பிறகு அவருக்கு அணியில் இடம் கிடைக்கவில்லை என்பது குறிப்பிடத்தக்கது.
