புவனேஸ்வர்:
ஹாக்கியில் சர்வதேச தரவரிசையில் முதல் 8 இடங்களில் உள்ள அணிகள் பங்கேற்கும் உலக ஹாக்கி லீக் பைனல்ஸ் தொடர் போட்டிகள் ஒடிசாவில் நடந்து வருகிறது. நேற்று ‘ஏ’ பிரிவில் கடைசி லீக் போட்டிகள் நடைபெற்றன. மாலை 5:30 மணிக்கு நடைபெற்ற லீக் போட்டியில் அர்ஜெண்டினா - ஸ்பெயின் அணிகள் மோதின.
இப்போட்டியின் 21-வது நிமிடத்தில் அர்ஜெண்டினாவின் பரேடெஸ் மேட்டியாஸ் முதல் கோல் அடித்தார். இதனால் 1-0 என்ற கோல் கணக்கில் அர்ஜெண்டினா முன்னிலை பெற்றது. அதன்பின்னர் மூன்றாம் கால்பகுதி ஆட்டநேர முடிவு வரை இரு அணியினரும் வேறு எந்த கோலும் அடிக்கவில்லை.
தொடர்ந்து நடைபெற்ற கடைசி கால்பகுதி ஆட்டநேரத்தின் 50-வது நிமிடத்தில் ஸ்பெயினின் கியூமடா பவு கோல் அடித்தார். அதைத்தொடர்ந்து ஆட்டம் முடிய ஒரு நிமிடமே இருந்த நிலையில் ஸ்பெயினின் ரோமியூ ஜோசப் கோல் அடித்தார். இதன் காரணமாக 2-1 என்ற கோல் கணக்கில் ஸ்பெயின் வெற்றி பெற்றது.
இரவு 7:30 மணிக்கு தொடங்கிய மற்றொரு ‘ஏ’ பிரிவு லீக் போட்டியில் பெல்ஜியம், நெதர்லாந்தை எதிர்கொண்டது. இப்போட்டியின் 19-வது மற்றும் 30-வது நிமிடத்தில் பெல்ஜியம் அணியின் லைபேர்ட் லாயிக் தொடர்ந்து இரண்டு கோல்கள் அடித்தார். அதைத்தொடர்ந்து 32-வது நிமிடத்தில் பெல்ஜியம் அணியின் பூன் டாம் மேற்கொண்டு ஒரு கோல் அடித்தார். நெதர்லாந்து அணியினர் இறுதிவரை எந்த கோலும் அடிக்கவில்லை. இதனால் பெல்ஜியம் அணியினர் 3-0 என்ற கோல் கணக்கில் வெற்றி பெற்றனர்.
இன்று நடைபெறும் காலிறுதி போட்டிகளில் ஸ்பெயின் - ஆஸ்திரேலியா, பெல்ஜியம் - இந்தியா அணிகள் பலப்பரீட்சை செய்ய உள்ளன.
