கெவ்லோன்:
ஹாங்காங் சூப்பர் சீரிஸ் பேட்மிண்டன் போட்டி கெவ்லோன் நகரில் நேற்று தொடங்கியது. இதில் இன்று நடந்த பெண்கள் ஒற்றையர் பிரிவு முதல் சுற்று ஆட்டம் ஒன்றில் இந்தியாவின் சாய்னாநேவால்- டென் மார்க் வீராங்கனை மெட்டே போல்சென் மோதினர்.
விறுவிறுப்பாக நடந்த இந்த ஆட்டத்தில் சாய்னா நேவால் 21-19, 23-21 என்ற நேர் செட் கணக்கில் போராடி வென்று 2-வது சுற்றுக்கு தகுதி பெற்றார். இந்த ஆட்டம் 46 நிமிடம் நடந்தது. சாய்னா நேவால் 2-வது சுற்றில் சீனா வீராங்கனை சென் யூபெய்யுடன் மோதுகிறார்.
இந்தியாவின் முன்னணி வீராங்கனையான பி.வி. சிந்து தனது முதல் சுற்றில் ஹாங் காங்கின் வேனுஸ்யூட்யுடன் மோதுகிறார்.
ஆண்கள் ஒற்றையர் பிரிவில் இன்று நடந்த முதல் சுற்று ஆட்டம் ஒன்றில் இந்திய வீரர் காஷ்யப்- தென்கொரியா வின் டாங்லீ மோதினர். இதில் காஷ்யப் 21-15, 9-21, 20-22 என்ற செட் கணக்கில் தோல்வி அடைந்தார்.
இதேபோல் மற்றோரு இந்திய வீரரான சுபரத் வர்மா முதல் சுற்றில் தோல்வி அடைந்தார். அவர் இந்தோனேஷிய வீரர் டாமி சுகிடோவிடம் 15-21, 8-21, என்ற நேர்செட் கணக்கில் தோல்வி அடைந்து வெளியேறினார்.
