சென்னை:
தமிழ்நாடு விளையாட்டு மேம்பாட்டு ஆணையத்தின் சென்னை மாவட்ட பிரிவு சார்பில் இந்த ஆண்டுக்கான முதல்-அமைச்சர் கோப்பைக்கான சென்னை மாவட்ட அளவிலான விளையாட்டு போட்டிகள் (இருபாலருக்கும்) சென்னையில் பல்வேறு மைதானங்களில் அடுத்த மாதம் (டிசம்பர்) 2-ந் தேதி முதல் 5-ந் தேதி வரை நடக்கிறது. இதில் தடகளம் மற்றும் கூடைப்பந்து போட்டி நேரு ஸ்டேடியத்திலும், கைப்பந்து போட்டி எழும்பூரில் உள்ள மேயர் ராதாகிருஷ்ணன் ஸ்டேடியத்திலும் டிசம்பர் 2-ந் தேதி நடக்கிறது.
கபடி போட்டி நொச்சிக்குப்பத்தில் உள்ள சிங்காரவேலர் மைதானத்தில் 2 மற்றும் 3-ந் தேதிகளில் நடைபெறுகிறது. நீச்சல் போட்டி வேளச்சேரி நீச்சல் வளாகத்திலும், டேபிள் டென்னிஸ் போட்டி நேரு ஸ்டேடியத்திலும் 3-ந் தேதி நடக்கிறது. டென்னிஸ் போட்டி நுங்கம்பாக்கம் ஸ்டேடியத்திலும், கால்பந்து போட்டி நேரு ஸ்டேடியத்திலும் 4-ந் தேதி நடைபெறுகிறது. ஆக்கி போட்டி எழும்பூரில் உள்ள மேயர் ராதாகிருஷ்ணன் ஸ்டேடியத்திலும், பேட்மிண்டன் போட்டி ஷெனாய்நகர் உள்விளையாட்டு அரங்கிலும் 5-ந் தேதி நடக்கிறது. இந்த போட்டியில் 1-1-1997-க்கு பிறகு பிறந்தவர்களும், சென்னையில் பிறந்தவர்கள், படிப்பவர்கள் மற்றும் வேலைபார்ப்பவர்கள் கலந்து கொள்ள முடியும்.
மாவட்ட அளவிலான போட்டியில் முதல் 3 இடங்களை பிடிப்பவர்களுக்கு முறையே தலா ரூ.1,000, ரூ.750, ரூ.500 பரிசாக வழங்கப்படும். அத்துடன் முதலிடத்தை பிடிக்கும் வீரர்கள் மற்றும் அணிகள் மாநில போட்டிக்கு தகுதி பெறும்.
இந்த தகவலை சென்னை மாவட்ட விளையாட்டு அதிகாரி பிரேம்குமார் தெரிவித்துள்ளார்.
